នាព្រឹកថ្ងៃទី០៤ ខែធ្នូ ឆ្នាំ២០២៣ ជំទាវកិត្តិនីតិកោសលបណ្ឌិត ទី បូរ៉ាស៊ី ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃព្រឹទ្ធសភា អនុប្រធានក្រុមសភាជាតិកម្ពុជា-សភាប្រើភាសាបារាំង និងជាប្រធានបណ្តាញស្រ្តីសភា នៃក្រុមសភាជាតិកម្ពុជា-សភាប្រើភាសាបារាំង បានអញ្ជើញជាអធិបតីភាពក្នុងពិធីបើកសិក្ខាសាលាការផ្លាស់ប្តូរព័ត៌មានក្នុងស្ថាប័ន ស្តីពីអត្រានុកូលដ្ឋាន និងការចុះសំបុត្រ កំណើតនៅកម្ពុជា នៅវិមានព្រឹទ្ធសភា ក្រោមការរៀបចំដោយសភានៃព្រះរាជាណាចក្រកម្ពុជា សហការជាមួយសភាប្រើភាសាបារាំង ទីភ្នាក់ងារបារាំងសម្រាប់អភិវឌ្ឍន៍ និងមជ្ឈមណ្ឌលសភាអាស៊ី ដោយមានការចូលរួមពីសមាជិក សមាជិកាព្រឹទ្ធសភា-រដ្ឋសភា តំណាងរាស្រ្ដមកពីរដ្ឋសភាឡាវ ថ្នាក់ដឹកនាំអគ្គលេខាធិការដ្ឋានព្រឹទ្ធសភា-រដ្ឋសភា និង តំណាងមន្ត្រីសង្គមស៊ីវិលនៅកម្ពុជា ព្រមទាំងតំណាងអង្គទូតនានាសរុបចំនួន១៨០នាក់។
សិក្ខាសាលានេះ ប្រព្រឹត្តទៅរយៈពេលចំនួន០២ថ្ងៃ ចាប់ពីថ្ងៃទី០៤ និងទី០៥ ខែធ្នូ ឆ្នាំ២០២៣ ដោយពិភាក្សាលើប្រធានបទសំខាន់ៗ ដូចជា៖
១-ការពង្រឹងចំណេះដឹងរបស់សមាជិកទើបនឹងជាប់ឆ្នោត និងមន្ត្រីសភាលើប្រព័ន្ធនិងក្របខ័ណ្ឌច្បាប់នៃអត្រានុកូលដ្ឋាន និងការចុះឈ្មោះកំណើតជាធរមាននៅកម្ពុជា
២-ការលើកទឹកចិត្តដល់ការកែលម្អប្រព័ន្ធនិងការផ្តួចផ្តើមគំនិតថ្មី កាលបរិច្ឆេទនិងទីតាំងនៃសិក្ខាសាលាដើម្បីលុបបំបាត់នូវឧបសគ្គនានាដល់ការចុះសំបុត្រកំណើត
៣-ការលើកកម្ពស់ការយល់ដឹងនៅមូលដ្ឋាន និងទី៤-ការកំណត់អត្តសញ្ញាណសម្រាប់សកម្មភាពរបស់សមាជិកសភាដើម្បីជំរុញការចុះសំបុត្រកំណើត៖ ការផ្ទៀងផ្ទាត់ការអនុវត្តច្បាប់ ការចល័តតួអង្គនិងអង្គភាពពាក់ព័ន្ធក្នុងមណ្ឌលរបស់ខ្លួន ។
ប្រភព៖ នាយកដ្ឋានព័ត៌មាន
