ឯកឧត្តម ឡាយ សំកុល អនុញ្ញាតឱ្យឯកឧត្តម តានិណៃ អ៊ិជិតូម៉ូ ចូលជួបសម្តែងការគួរសម និងពិភាក្សាការងារ
នារសៀលថ្ងៃពុធ ២កើត ខែចេត្រ ឆ្នាំថោះ បញ្ចស័ក ពុទ្ធសករាជ២៥៦៧ ត្រូវនឹងថ្ងៃទី១០ ខែមេសា ឆ្នាំ២០២៤ ឯកឧត្តម ឡាយ សំកុល អគ្គលេខាធិការព្រឹទ្ធសភា បានអនុញ្ញាតឱ្យឯកឧត្តម តានិណៃ អ៊ិជិតូម៉ូ (TANINAI Ichitomo) អគ្គទីប្រឹក្សា និងជាអនុប្រធានបេសកកម្មនៃស្ថានទូតជប៉ុនប្រចាំនៅព្រះរាជាណាចក្រកម្ពុជា និងសហការីចូលជួបសម្តែងការគួរសម និងពិភាក្សាការងារ នៅបន្ទប់ប្រជុំរបស់ឯកឧត្តមអគ្គលេខាធិការព្រឹទ្ធសភា។
ជំនួបពិភាក្សានេះផ្តោតសំខាន់លើការបន្តពង្រឹងពង្រីកទំនាក់ទំនង និងកិច្ចសហប្រតិបត្តិការដ៏ល្អរវាងព្រឹទ្ធសភាកម្ពុជា និងព្រឹទ្ធសភាជប៉ុន។
ឯកឧត្តមអគ្គលេខាធិការព្រឹទ្ធសភាបានជម្រាបឯកឧត្តម តានិណៃ អ៊ិជិតូម៉ូ អំពីការងារអាទិភាពសំខាន់ៗរបស់ព្រឹទ្ធសភា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា។
ភាគីទាំងពីរបានប្តេជ្ញាថានឹងជំរុញកិច្ចសហប្រតិបត្តិការរវាងព្រឹទ្ធសភាកម្ពុជា និងព្រឹទ្ធសភាជប៉ុនឲ្យកាន់តែប្រសើរឡើង។
ក្នុងឱកាសនោះដែរ ឯកឧត្តម តានិណៃ អ៊ិជិតូម៉ូ ក៏បានចូលរួមអបអរសាទរចំពោះឯកឧត្តម ឡាយ សំកុល ដែលត្រូវបានផ្តល់សេចក្តីទុកចិត្តពីសំណាក់ថ្នាក់ដឹកនាំជាន់ខ្ពស់ព្រឹទ្ធសភា តែងតាំងជាអគ្គលេខាធិការព្រឹទ្ធសភា៕
ប្រភព៖ នាយកដ្ឋានព័ត៌មាន
