នៅព្រឹកថ្ងៃទី១៤ ខែតុលា ឆ្នាំ២០២៤ ឯកឧត្តម អ៊ុច បូររិទ្ធ អនុប្រធានទី២ ព្រឹទ្ធសភា និងគណៈប្រតិភូសភាកម្ពុជា (ព្រឹទ្ធសភា និងរដ្ឋសភា) បានអញ្ជើញចូលរួមក្នុងកិច្ចប្រជុំក្រុមប្រឹក្សា នៃមហាសន្និបាតសហភាពអន្តរសភា (IPU) លើកទី២១៤ និងនៅទីក្រុងហ្សឺណែវ ប្រទេសស្វីស។
កិច្ចប្រជុំបានពិភាក្សាផ្អែកតាមរបៀបវារៈសំខាន់ៗ និងបានអនុម័តលើ៖ ១- របាយការណ៍សកម្មភាពរបស់ក្រុមប្រឹក្សាភិបាល និងគណៈកម្មាធិការប្រតិបត្តិ នៃ IPU នៅចន្លោះសម័យប្រជុំ, ២-បញ្ហាហរិញ្ញវត្ថុ និងថវិកា, ៣- ការធ្វើវិសោធនកម្មលក្ខន្តិកៈរបស់ IPU, ៤-ការពិនិត្យឡើងវិញ និងការបោះឆ្នោតជ្រើសរើសបំពេញសមាជិកគណៈកម្មាធិការប្រតិបត្តិដែលទំនេរ និងសម្រេចលើសមាជិកភាព IPU។ កិច្ចប្រជុំក៏បានធ្វើការកត់សម្គាល់លើរបាយការណ៍ របស់គណៈកម្មាធិការអចិន្រ្តៃយ៍នានា និងវេទិកាពាក់ព័ន្ធផ្សេងៗ ក៏ដូចជាគម្រោងនៃកិច្ចប្រជុំពាក់ព័ន្ធសម្រាប់ឆ្នាំ២០២៥ផងដែរ។
នៅថ្ងៃដដែល ឯកឧត្តមអនុប្រធានទី២ ព្រឹទ្ធសភា និងគណៈប្រតិភូសភាកម្ពុជា ក៏បានអញ្ជើញចូលរួមពិធីបើកជាផ្លូវការមហាសន្និបាត នៃ IPU លើកទី១៤៩ ក្រោមអធិបតីភាពរបស់លោកជំទាវ Tulia Ackson ប្រធានសហភាពអន្តរសភា ដែលមានការចូលរួមដោយប្រធានសភាចំនួន៥០រូប និងគណៈប្រតិភូសភានៃប្រទេសជាសមាជិក IPU។
ប្រភព៖ អគ្គនាយកដ្ឋានពិធីការនិងទំនាក់ទំនងអន្តរជាតិ
