ឯកឧត្តមបណ្ឌិត ធន់ វឌ្ឍនា ប្រធានស្តីទីព្រឹទ្ធសភា បានអញ្ជើញជាអធិបតីក្នុងពិធីជប់លៀងដំណាច់ឆ្នាំរបស់សមាគមអតីតនិស្សិតខ្មែរពីប្រទេសជប៉ុន (Japan Alumni of Cambodia) នៅសណ្ឋាគារហ៊ីម៉ាវ៉ារី រាជធានីភ្នំពេញ នាល្ងាចថ្ងៃទី៩ ខែធ្នូ ឆ្នាំ២០២៤ ដោយមានការចូលរួមពីថ្នាក់ដឹកនាំក្រសួង ស្ថាប័ននានានៃរាជរដ្ឋាភិបាលកម្ពុជា ឯកឧត្តមឯកអគ្គរាជទូតជប៉ុនប្រចាំកម្ពុជា និងអតីតនិស្សិតខ្មែរមកពីប្រទេសជប៉ុន និងបណ្តាក្រុមហ៊ុនជប៉ុននៅប្រទេសកម្ពុជា។
ឯកឧត្តមប្រធានស្តីទីព្រឹទ្ធសភា បានលើកឡើងនូវចំណុចសំខាន់បីសម្រាប់អ្នកចូលរួម៖
ទី១- ភាពជោគជ័យរបស់កម្ពុជា ក្នុងការកាត់បន្ថយភាពក្រីក្រ ការអភិវឌ្ឍធនធានមនុស្ស ការអភិវឌ្ឍហេដ្ឋារចនាសម្ព័ន្ធ ការលើកកម្ពស់សុខុមាលភាពរបស់ប្រជាជន និងកំណើនសេដ្ឋកិច្ចខ្ពស់រយៈពេលកន្លងមកនេះ គឺទទួលបានការរួមចំណែកយ៉ាងសប្បុរសពីមិត្តជប៉ុន។
ទី២- ជប៉ុនត្រូវបានស្គាល់ថា គុណភាព ភាពស្មោះត្រង់ និងបច្ចេកវិទ្យា ធ្វើឱ្យប្រជាជនកម្ពុជាមានការកោតសរសើរចំពោះផលិតផល និងសេវាកម្មរបស់ជប៉ុន ដោយក្រុមហ៊ុនជប៉ុន ជាច្រើនទទួលបានការស្វាគមន៍ពីកម្ពុជា។
ទី៣- ពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសកម្ពុជា-ជប៉ុន។
បន្ទាប់មកឯកឧត្តមប្រធានស្តីទីព្រឹទ្ធសភា ក៏បានលើកផងដែរអំពីការចង់បង្កើតកម្មវិធីផ្លាស់ប្ដូរសម្រាប់ថ្នាក់ដឹកនាំរបស់ប្រទេសកម្ពុជា-ជប៉ុន ដោយមានគោលជំហរឹងមាំក្នុងការជួយគាំទ្រគ្នាទៅវិញទៅមក ទាំងក្នុងតំបន់ និងលើកឆាកអន្តរជាតិ…។
ប្រភព៖ នាយកដ្ឋានព័ត៌មាន
