ឯកឧត្តមបណ្ឌិត ធន់ វឌ្ឍនា៖ ប្រធានាធិបតី ត្រាំ នឹងបន្ធូរពន្ធសម្រាប់កម្ពុជា និងប្រទេសជាច្រើនទៀត។
នៅល្ងាចថ្ងៃទី៧ ខែមេសា ឆ្នាំ២០២៥ នៅសាលពិសេស៣ វិមានព្រឹទ្ធសភា ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា និងជាប្រធានក្រុមមិត្តភាពព្រឹទ្ធសភាកម្ពុជា-ជប៉ុន បានប្រជុំ និងទទួលទានអាហារជាមួយឯកឧត្តមអគ្គរាជទូតជប៉ុន និងសហការី ដើម្បីអបអរពិធីសង្រ្កាន្តឆ្នាំថ្មី និងពង្រឹងមិត្តភាពកម្ពុជា-ជប៉ុន។
ក្នុងឱកាសនោះ ឯកឧត្តមបណ្ឌិត ធន់ វឌ្ឍនា បានរំលឹកអំពីទំនាក់ទំនងការទូតរវាងកម្ពុជា-ជប៉ុន ដែលមានឡើងតាំងពីឆ្នាំ១៩៥៣ និងបានវាយតម្លៃខ្ពស់ចំពោះទំនាក់ទំនងកម្ពុជា-ជប៉ុន ដែលបានពង្រឹងពង្រីកឥតឈប់ឈរ តាមរយៈការផ្លាស់ប្តូរទស្សនកិច្ចរវាងថ្នាក់ដឹកនាំកំពូលនៃប្រទេសទាំងពីរ និងជាពិសេសតាមរយៈកំណើនពាណិជ្ជកម្មនៃប្រទេសទាំង២។
ឯកឧត្តមបណ្ឌិត ធន់ វឌ្ឍនា និងឯកឧត្តមអគ្គរាជទូតជប៉ុន ក៏បានពិភាក្សាគ្នាអំពីស្ថានភាពពិភពលោក ជាពិសេសសង្រ្គាមពាណិជ្ជកម្មដែលកំពុងតែតឹងតែង។ ឯកឧត្តមបណ្ឌិត ធន់ វឌ្ឍនា បានមានប្រសាសន៍ទៅកាន់ឯកឧត្តមអគ្គរាជទូតជប៉ុន ថា “នៅក្នុងស្ថានភាពដែលពិភពលោកកំពុងតែជួបការធ្លាក់ចុះនៃពហុភាគីនិយម និងភាពមិនច្បាស់លាស់នៃភូមិសាស្រ្តនយោបាយ កម្ពុជា និងជប៉ុន ចាំបាច់ត្រូវតែពង្រឹងទំនាក់ទំនង និងមិត្តភាព ឱ្យកាន់តែខ្លាំងឡើងជាងពេលណាៗទាំងអស់”។ ឯកឧត្តមអគ្គរាជទូតជប៉ុន បានសម្តែងការគាំទ្រ និងប្រសាសន៍របស់ឯកឧត្តមបណ្ឌិត ដោយបញ្ជាក់ពីជំហររបស់ជប៉ុន ដែលនឹងឈរជាប់ជាមួយកម្ពុជា ដើម្បីវិបុលភាពរបស់ប្រទេសទាំងពីរផង និងតំបន់ផង។ ឯកឧត្តមបណ្ឌិត ធន់ វឌ្ឍនា មានប្រសាន៍ថា ប្រធានាធិបតី ត្រាំ នឹងបន្ធូរពន្ធសម្រាប់កម្ពុជា និងប្រទេសជាច្រើនទៀត តាមរយៈការចចារគ្នា។
ខ្លឹមសារ៖ ខុទ្ទកាល័យអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន
