នៅព្រឹកថ្ងៃអាទិត្យ ទី៦ ខែមេសា ឆ្នាំ២០២៥ ឯកឧត្តម អ៊ុច បូររិទ្ធអនុប្រធានទី១ ព្រឹទ្ធសភា និងគណៈ-ប្រតិភូសភាកម្ពុជា (ព្រឹទ្ធសភានិងរដ្ឋសភា) បានអញ្ជើញចូលរួមក្នុងកិច្ចប្រជុំក្រុមប្រឹក្សាភិបាលលើកទី២១៥(215 session of the Governing Council) នៃមហាសន្និបាតសហភាពអន្តរសភា (IPU) លើកទី១៥០ នៅទីក្រុងតាស្កិន ប្រទេសអ៊ូសបេគីស្ថាន។
កិច្ចប្រជុំបានពិភាក្សាផ្អែកលើរបៀបវារៈសំខាន់ៗ ព្រមទាំងបានអនុម័តនិងកត់សម្កាល់លើ៖
១- កំណត់ហេតុសង្ខេបនៃកិច្ចប្រជុំក្រុមប្រឹក្សាភិបាលលើកទី២១៤,
២- ការបោះឆ្នោតជ្រើសតាំងប្រធាននិងអនុប្រធានដឹកនាំមហាសន្និបាត,
៣- របាយការណ៍របស់ប្រធានសហភាពអន្តរសភាស្តីពីសកម្មភាពរបស់ប្រធាន IPU ក្រោយ កិច្ចប្រជុំក្រុមប្រឹក្សាភិបាលលើកទី២១៤ និងសកម្មភាពរបស់គណៈកម្មាធិការប្រតិបត្តិរបស់ IPU,
៤-របាយការណ៍របស់អគ្គលេខាធិការស្តីពីសកម្មភាពរបស់ IPU ប្រចាំឆ្នាំ២០២៤,
៥- ស្តាប់របាយការណ៍លទ្ធផលហិរញ្ញវត្ថុឆ្នាំ២០២៤ របស់ IPU, និង
៦- កំណត់មូលបទអទិភាពនៃឆ្នាំ២០២៥ ស្តីពីការជំរុញសមភាពយែនឌ័រ។
នៅបន្ទាប់ពីកិច្ចប្រជុំក្រុមប្រឹក្សាភិបាលលើកទី២១៥ ឯកឧត្តមអនុប្រធានទី១ព្រឹទ្ធសភា និងគណៈប្រតិភូសភាកម្ពុជា បានបន្តអញ្ជើញចូលរួមក្នុងកិច្ចពិភាក្សាទូទៅនៃមហាសន្និបាត IPU លើកទី១៥០ ក្រោមមូលបទ ស្តីពី“សកម្មភាពសភាដើម្បីការអភិវឌ្ឍសង្គម និងយុត្តិធម៌”។
ប្រភព៖ អគ្គនាយកដ្ឋានពិធីការនិងទំនាក់ទំនងអន្តរជាតិ
