នៅរសៀលថ្ងៃទី ២៨ ខែសីហា ឆ្នាំ២០២៥ ឯកឧត្តមបណ្ឌិត ធន់ វឌ្ឍនា អនុប្រធានទី២ នៃព្រឹទ្ធសភា បានអនុញ្ញាត ឱ្យឯកឧត្តម TSUTSUMI Naohiro អគ្គរាជទូតសម្រាប់កិច្ចការសិទ្ធិមនុស្ស និងសន្តិភាព ស្ថិរភាពអន្តរជាតិ ក្រសួងការបរទេសជប៉ុន ចូលជួបពិភាក្សាការងារអំពីវឌ្ឍនភាព ស្ថានភាពសិទ្ធិមនុស្សនៅព្រះរាជាណាចក្រកម្ពុជា។
ជាកិច្ចចាប់ផ្តើម ឯកឧត្តមបណ្ឌិត អនុប្រធានទី២ ព្រឹទ្ធសភា បានទទួលស្វាគមន៍យ៉ាងកក់ក្តៅដល់ឯកឧត្តម TSUTSUMI Naohiro និងសេចក្តីរីករាយសម្រាប់ជំនួបពិភាក្សាដ៏សំខាន់ក្នុងឱកាសនេះ។ ឯកឧត្តមបណ្ឌិត បានជម្រាបឯកឧត្តមអគ្គរាជទូត ពីមនោសញ្ជេតនាដ៏ល្អរបស់ប្រជាជនកម្ពុជា ចំពោះប្រទេស និងប្រជាជនជប៉ុន ដែលតែងតែជួយកម្ពុជា ជាពិសេសចាប់តាំងពី១៩៩៣ ទាំងក្នុងវិស័យច្បាប់ សេដ្ឋកិច្ច ពាណិជ្ជកម្ម និងការអប់រំ។
ក្នុងតួនាទីជាសមាជិកព្រឹទ្ធសភា ឯកឧត្តមបណ្ឌិត បានវាយតម្លៃពីស្ថានភាពទូទៅនៃការអនុវត្តច្បាប់ ស្ថានភាពសិទ្ធិមនុស្ស និងប្រជាធិបតេយ្យនៅក្នុងប្រទេសកម្ពុជា មានវឌ្ឍនភាពជាវិជ្ជមាន តាំងពីឆ្នាំ១៩៩៣មក ហើយការបោះឆ្នោតគឺ ទទួលបានការចូលរួមច្រើនពីប្រជាជន (អត្រាខ្ពស់ជាង80%)។
ក្នុងឱកាសនោះផងដែរ ឯកឧត្តម TSUTSUMI Naohiro បានវាយតម្លៃខ្ពស់និងអបអរសាទរចំពោះភាពរីកចម្រើនដ៏ឆាប់រហ័សរបស់កម្ពុជា។ ឯកឧត្តម បន្តថាជប៉ុន គឺជាមិត្តដ៏ល្អរបស់កម្ពុជា មិនថាថ្ងៃនេះ ឬទៅថ្ងៃអនាគត ជប៉ុននឹងបន្តចូលរួមជួយអភិវឌ្ឍកម្ពុជា លើគ្រប់វិស័យ ដែលរួមមានទាំងផ្នែកសិទ្ធមនុស្ស និងប្រជាធិបតេយ្យផងដែរ។ ជាមួយគ្នានេះ ឯកឧត្តម ជឿជាក់ថា កម្ពុជា នឹងបន្តពង្រឹងសិទ្ធិមនុស្ស និងប្រជាធិបតេយ្យតទៅមុខទៀត។
ឯកឧត្តមបណ្ឌិត បានបញ្ជាក់ថា បើគ្មានសន្តិភាព គឺគ្មានសិទ្ធិអ្វីៗទាំងអស់ រួមទាំងសិទ្ធិមនុស្ស និងប្រជាធិបតេយ្យ។ ដូចករណីព្រំដែនកម្ពុជា-ថៃ នាពេលបច្ចុប្បន្ន សិទ្ធិរស់រានមានជីវិតប្រកបដោយសេចក្តីថ្លៃថ្នូរ និងលំនៅស្ថានឯកជន របស់ប្រជាជនកម្ពុជា កំពុងត្រូវបានរំលោភបំពាន ដោយកងទ័ពថៃ បានបណ្ដេញពួកគាត់ចេញពីផ្ទះ និងប្រើបន្លាលួសព័ន្ធភូមិដ្ឋានរបស់ពួកគាត់ដែលកំពុងរស់នៅ។
ខ្លឹមសារ៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន
