នៅព្រឹកថ្ងៃអាទិត្យ ២រោច ខែពិសាខ ឆ្នាំមមី អដ្ឋស័ក ពុទ្ធសករាជ២៥៦៩ ត្រូវនឹងថ្ងៃទី៣ ខែឧសភា ឆ្នាំ២០២៦ ឯកឧត្តម អ៊ុច បូររិទ្ធ ប្រធានស្តីទីព្រឹទ្ធសភានិងជាប្រធានក្រុមសភាជាតិកម្ពុជា នៃសភានិយាយភាសាបារាំង (APF) បានអញ្ជើញជាអធិបតីបើកកិច្ចប្រជុំគណៈកម្មការនយោបាយ នៃសភាប្រើភាសាបារាំងនៅសណ្ឋាគារអង្គរប៉ារ៉ាឌី ខេត្តសៀមរាប ដោយមានការអញ្ជើញចូលរួមពីសំណាក់សមាជិក សមាជិកា នៃសភាកម្ពុជា សភាប្រើភាសាបារាំង (Assemblée parlementaire de la Francophonie-APF) មកពី ១៥ ប្រទេស និងតំណាងអង្គការអន្តរជាតិហ្រ្វង់កូហ្វូនី (Organisation internationale de la Francophonie – OIF) ព្រមទាំងមន្ត្រីជាន់ខ្ពស់នៃអគ្គលេខាធិការដ្ឋានព្រឹទ្ធសភា និងរដ្ឋសភា និងសភាប្រើភាសាបារាំង។ ក្នុងឱកាសនេះដែរ ឯកឧត្តម Chevrollier GUILLAUME ប្រធានគណៈកម្មការនយោបាយAPF និងជាសមាជិកព្រឹទ្ធសភាបារាំង ក៏បានចូលរួមថ្លែងសុន្ទរកថាផងដែរ។
 
កិច្ចប្រជុំនេះ ដំណើរការពីថ្ងៃទី៣ ដល់ថ្ងៃទី៤ ខែឧសភា ឆ្នាំ២០២៦  ដោយផ្តោតលើរបៀបវារៈសំខាន់ៗ ដូចជា៖
− ការអនុម័តសេចក្តីសង្ខេបនៃសេចក្តីសម្រេចចិត្តនៃកិច្ចប្រជុំគណៈកម្មការនយោបាយ ខែកក្កដា ឆ្នាំ២០២៥ នៅទីក្រុងប៉ារីស។
− ការពិនិត្យ និងពិភាក្សាអំពីទោសប្រហារជីវិតនៅក្នុងតំបន់សភាប្រើភាសាបារាំងជាដើម។
− ការពិនិត្យស្ថានភាពនយោបាយក្នុងប្រទេសប្រើភាសាបារាំង។
− បច្ចុប្បន្នភាពរបស់ក្រុមសភាជាតិនីមួយៗ។
− ការពិភាក្សាអំពីតួនាទីរបស់សភាប្រើភាសាបារាំងក្នុងការធ្វើឱ្យមានស្ថិរភាពនៅក្នុងតំបន់និងសកលលោក និងអនុសាសន៍របស់សមាជិកសភា ដើម្បីធ្វើឱ្យសន្តិភាពជាកម្លាំងចលករសម្រាប់ការអភិវឌ្ឍប្រកបដោយចីរភាព។
 
ប្រភព៖ នាយកដ្ឋានព័ត៌មាន