ក្រុមសមាជិកព្រឹទ្ធសភាប្រចាំភូមិភាគទី២ ចុះសំណេះសំណាលអាជ្ញាធរខេត្តត្បូងឃ្មុំ អំពីការផ្តល់សេវាសាធារណៈ និងការអភិវឌ្ឍមូលដ្ឋាន
នារសៀលថ្ងៃទី៣០ ខែធ្នូ ឆ្នាំ២០២១ ក្រុមសមាជិកព្រឹទ្ធសភាប្រចាំភូមិភាគទី២ ដឹកនាំដោយឯកឧត្តម ឈិត គឹមយាត អនុប្រធានក្រុមសមាជិកព្រឹទ្ធសភាប្រចាំភូមិភាគទី២ តំណាងឱ្យឯកឧត្តម អ៊ុក ប៊ុនឈឿន ប្រធានក្រុមសមាជិកព្រឹទ្ធសភាប្រចាំភូមិភាគទី២ បានអញ្ជើញចុះជួបសំណេះសំណាលជាមួយនឹងសមាជិក សមាជិកាក្រុមប្រឹក្សាក្រុង ស្រុក ឃុំ សង្កាត់ អធិការនគរបាល និងនាយប៉ុស្តិ៍នគរបាលរដ្ឋបាលសង្កាត់ នៅសាលាក្រុងសួង ខេត្តត្បូងឃ្មុំ ដើម្បីក្តាប់នូវស្ថានការណ៍ជាក់ស្តែង ពិនិត្យតាមដានយន្តការនៃការអនុវត្តកម្មវិធីនយោបាយភូមិឃុំ មានសុវត្ថិភាពទាំង០៧ចំណុច នៅមូលដ្ឋានរបស់រាជរដ្ឋាភិបាល ការដកថវិកាសម្រាប់ការអភិវឌ្ឍឃុំ សង្កាត់ នៅមូលដ្ឋាននាពេលកន្លងមក បញ្ហាពាក់ព័ន្ធនឹងការងារគណៈកម្មាធិការទទួលបន្ទុកកិច្ចការនារី និងកុមារឃុំ និងស្ថានភាពជំងឺកូវិដ១៩ នាពេលបច្ចុប្បន្ន វិធានការបង្ការ ការពារ ទប់ស្កាត់ អប់រំប្រជាពលរដ្ឋ និងឈ្វេងយល់អំពីបញ្ហាប្រឈមនានារបស់ក្រុង ស្រុក ឃុំ សង្កាត់នីមួយៗក្នុងខេត្តត្បូងឃ្មុំ ដែលបានកំពុងជួបប្រទះ និងសំណូមពរផ្សេងៗ។
