ដោយមានការណែរនាំដ៏ខ្ពង់ខ្ពស់ពីសំណាក់ ឯកឧត្តមកិត្តិសង្គហបណ្ឌិត ទេព ងន អនុប្រធានទី២ ព្រឹទ្ធសភា នាព្រឹកថ្ងៃទី១៥ ខែតុលា ឆ្នាំ២០២២ នេះ ឯកឧត្តម ប្រាក់ ចំរើន អនុប្រធានគណៈកម្មការទី៨ និងជាអនុប្រធានក្រុមសមាជិកព្រឹទ្ធសភាប្រចាំភូមិភាគទី៣ បានអញ្ជើញ សួរសុខទុក្ខ និង ចូលរួមរំលែកទុក្ខជាមួយក្រុមគ្រួសារសពកុមារទាំង ១១នាក់ ដែលបាត់បង់ជីវិតក្នុងឧបទ្ទវហេតុលិចទូក កាលពីល្ងាចថ្ងៃទី១៣ ខែតុលា ឆ្នាំ២០២២ ស្ថិតក្នុងភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្តាល។
ក្នុងឱកាសនោះដែរ ឯកឧត្តម បានសម្ដែងនូវការសោកស្តាយជាខ្លាំងចំពោះការបាត់បង់អាយុជីវិតកុមាទាំង ១១នាក់ និងបានពាំនាំនូវការផ្តាំផ្ញើសួរសុខទុក្ខ និងចូលរួមរំលែកទុក្ខដ៏ក្រៀមក្រំពីសំណាក់ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា ពីព្រោះការបាត់បង់ជីវិតកុមារទាំង១១រូបនេះមិនត្រឹមតែជាការសោកស្តាយរបស់ក្រុមគ្រួសារនៃសពប៉ុណ្ណោះទេ តែជាព្រឹត្តិការណ៍ដែលធ្វើឱ្យប្រជាជនទូទាំងប្រទេស ជាពិសេសថ្នាក់ដឹកនាំ មានការរន្ធត់ អាណិតអាសូរជាពន់ពេក និងសូមបួងសួងឱ្យវិញ្ញាណក្ខន្ធក្មួយទាំង ១១នាក់ បានសោយសុខក្នុងឋានសុគតិភព។
ជាការចូលរួមរំលែកទុក្ខ ឯកឧត្តម ប្រាក់ ចំរើន បានចូលរួមឧបត្ថម្ភថវិកាជូនគ្រួសារសពទាំង១១គ្រួសារ ក្នុងមួយគ្រួសារ ១លានរៀន ឧបត្ថម្ភដល់គ្រួសាររងគ្រោះ៤គ្រួសារ ក្នុងមួយគ្រួសារ ៥០ម៉ឺនរៀល និងបានឧបត្ថម្ភដល់កងកម្លាំង និងអាជ្ញាធរឃុំ ចំនួន ២លានរៀល៕
ប្រភព៖ខុទ្ទកាល័យអនុប្រធានទី២
