នាព្រឹកថ្ងៃទី២៤ ខែធ្នូ ឆ្នាំ២០២២ ឯកឧត្តមកិត្តិសង្គហបណ្ឌិត ទេព ងន អនុប្រធានទី២ព្រឹទ្ធសភា តំណាងដ៏ខ្ពង់ខ្ពស់សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា បានអញ្ជើញជាអធិបតីភាពក្នុងពិធីសម្ពោធឧបដ្ឋានសាលា ខ្លោងទ្វារ សមិទ្ធផលនានា និងពិធីស្រោចស្រពសុគន្ធវារីប្រគេនព្រះចៅអធិការវត្តព្រែកជ្រៃ(ហៅវត្តជ្រោយបទុម) ស្ថិតក្នុងភូមិបារគូ សង្កាត់ដង្កោ ខណ្ឌដង្កោ រាជធានីភ្នំពេញ។
សមិទ្ធផលដែលសម្ពោធដាក់ឱ្យដំណើរការប្រើប្រាស់ជាផ្លូវការនាពេលនេះរួមមាន៖ សាលាឆាន់ កុដិ ខ្លោងទ្វារ រោងភត្ត ផ្ទាំងសិលាចារិកសាវតាវត្ត ជួសជុលព្រះវិហារ និងការដាំដើមឈើ២១៥០ដើម និងចាក់ដីបំពេញទីធ្លាវត្ត ព្រមទាំងរៀបចំបង្គោលភ្លើងសូឡាបំភ្លឺក្នុងវត្តចំនួន៥២បង្គោល សមិទ្ធផលទាំងអស់សរុបថវិកាចំនួន ៨១១,៦៧៥ដុល្លារអាមេរិក។
ក្នុងឱកាសនោះ ឯកឧត្តមកិត្តិសង្គហបណ្ឌិត ទេព ងន បានបំពាក់គ្រឿងឥស្សរិយយស ប្រគេន និងជូនដល់សប្បុរសជន ក្រោមកិច្ចខិតខំប្រឹងប្រែងរបស់ព្រះគ្រូចៅអធិការវត្ត គណៈកម្មការអាចារ្យវត្ត ពុទ្ធបរិស័ទ ចំណុះជើងវត្ត ព្រមទាំងការជួយឧបត្ថម្ភរបស់ពុទ្ធសាសនិក ជិតឆ្ងាយ ដែលមានមនុញ្ញផលជាកុសលដ៏ធំធេងនេះ កើតចេញពីស្មារតីចែករំលែកជួយគ្នា សាមគ្គីភាព ព្រមទាំងបំណងប្រាថ្នាដ៏ពិសិដ្ឋ ប្រកបដោយសទ្ធាជ្រះថ្លារបស់ពុទ្ធបរិស័ទ សប្បុរសជន និងក្រោមការដឹកនាំកសាងរបស់ព្រះតេជគុណចៅអធិការវត្ត ប្រកបដោយព្រះទ័យទុកដាក់ ដែលបានកសាងឡើងថ្មីក្នុងវត្តព្រែកជ្រៃ (ហៅវត្តជ្រោយបុទុម)នេះ បានប្រើប្រាស់ជាគុណប្រយោជន៍បម្រើដល់វិស័យព្រះពុទ្ធសាសនា ដែលជាសាសនារបស់រដ្ឋ និងជាចំណងដៃដ៏ថ្លៃថ្លាសម្រាប់ព្រះសង្ឃ ដែលគង់នៅក្នុងវត្តព្រែកជ្រៃ និងប្រជាជនដែលរស់នៅក្នុងមូលដ្ឋាននេះ សម្រាប់ធ្វើសក្ការៈគោរពបូជាតាមគន្លងនៃព្រះពុទ្ធសាសនាជាយូរអង្វែងតរៀងទៅ…៕

ប្រភព៖ នាយកដ្ឋានព័ត៌មាន