រសៀលថ្ងៃទី៣ ខែមីនា ឆ្នាំ២០២៣ នៅទីបញ្ជាការកងពលតូចថ្មើរជើង លេខ៥១ ស្ថិតនៅស្រុក ព្រះនេត្រព្រះ ខេត្តបន្ទាយមានជ័យ ឯកឧត្ដម ឈើយ ចាន់ណា លេខាធិការគណៈកម្មការទី៧ ព្រឹទ្ធសភានិងជាសមាជិកក្រុមសមាជិកព្រឹទ្ធសភា ប្រចាំភូមិភាគទី៤ បានអញ្ជើញចូលរួមពិធី បើកវគ្គហ្វឹកហ្វឺន ក្បាច់គុន នៃកងយោធពលខេមរភូមិន្ទ ជូនដល់សិក្ខាកាមជានាយទាហាន នាយទាហានរង និងពលទាហាន មកពីអង្គភាពចំណុះយោធភូមិភាគទី៥ រយៈពេលសិក្សា ចំនួន៥៥ថ្ងៃ មានសិក្ខាកាមចូលរួមប្រមាណជា២៥៨នាក់ ក្រោមអធិបតីភាព ឯកឧត្ដមឧត្ដមសេនីយ៍ទោ សេង ធារិន មេបញ្ជាការស្ដីទី យោធភូមិភាគទី៥ ពិធីនេះមានការអញ្ជើញចូលរួមពី មេបញ្ជាការរង នាយសេនាធិការរង នាយការិយាល័យ យោធភូមិភាគទី៥ មេបញ្ជាការ មេបញ្ជាការរង កងពលតូចថ្មើរជើងលេខ៥១ នាយទាហាន និងកម្មសិក្សាការី ចំណុះទីបញ្ជាការយោធភូមិភាគទី៥។ ថ្លែងក្នុងឱកាសនោះ ឧត្តមសេនីយ៍ទោ បានផ្តាំផ្ញើដល់គណៈកម្មការគ្រប់គ្រងវគ្គ ដោយពេលវេលាហ្វឹកហ្វឺនមាតិច ថ្ងៃសម្រាក ថ្ងៃបុណ្យមានច្រើន ដូច្នេះត្រូវគ្រប់គ្រងសិស្សឱ្យបាន១០០ភាគរយ យោធាចារ្យត្រូវប្រឹងប្រែងយកបទពិសោធន៍ល្អៗ បង្ហាត់បង្រៀនសិក្ខាកាមឱ្យងាយយល់ ឆាប់ចេះ ធានាគុណភាពហ្វឹកហ្វឺនបានល្អ ការស្នាក់នៅ និងការហូបឱ្យបានចុកឆ្ងាញ់ៗ ដើម្បីសុខភាពយោធិនហ្វឹកហ្វឺន។ សិក្ខាកាម ត្រូវគោរពវិន័យ បទបញ្ជាផ្ទៃក្នុង ត្រូវខិតខំរៀនសូត្រ ត្រងត្រាប់ស្តាប់គ្រូ ដើម្បីទទួលលទ្ធផលល្អពេលបញ្ចប់វគ្គ និងត្រូវថែរក្សាអនាម័យតាមការណែនាំរបស់ក្រសួងសុខាភិបាល។
