នាថ្ងៃទី២៩ ខែមេសា ឆ្នាំ២០២៣ គណៈប្រតិភូគណៈកម្មការទី២ ព្រឹទ្ធសភា ដឹកនាំដោយឯកឧត្តមកិត្តិសេដ្ឋាបណ្ឌិត ជា ជេដ្ឋ ប្រធានគណៈកម្មការ បានអញ្ជើញចុះបំពេញទស្សនកិច្ច និងសិក្សាឈ្វេងយល់អំពីសក្តានុពលក្នុងវិស័យកសិកម្ម នៅតំបន់រមណីយដ្ឋានអភិវឌ្ឍន៍កសិ-ទេសចរណ៍ ម៉ុង ឫទ្ធី សែនជ័យ ស្ថិតក្នុងឃុំស្គុះ ស្រុកសំរោងទង ខេត្តកំពង់ស្ពឺ។ ក្នុងដំណើរទស្សនកិច្ចនេះត្រូវបានទទួលស្វាគមន៍យ៉ាងកក់ក្តៅពីសំណាក់ ឯកឧត្តមបណ្ឌិត ម៉ុង ឫទ្ធី ប្រធានគណៈកម្មការទី៣ ព្រឹទ្ធសភា និងលោកជំទាវ ព្រមទាំងគណៈគ្រប់គ្រងនៃក្រុមហ៊ុន ម៉ុង ឫទ្ធី គ្រុប ដោយគណៈកម្មការបានចុះពិនិត្យដល់ទីកន្លែងដាំដំណាំ រួមមាន៖ ១-ដំណាំកូនឈើកម្រសម្រាប់ចែកជូនប្រជាជន ២-ដំណាំដើមស្វាយ ដើមដូង ដើមក្រូចថ្លុង ដើមត្របែក…។ល។ និង ៣-ហេដ្ឋារចនាសម្ព័ន្ធផ្សេងទៀតក្នុងតំបន់ ។