ក្រុមសមាជិកព្រឹទ្ធសភាប្រចាំភូមិភាគទី២ ផ្តល់ឧបករណ៍តេស្តរហ័សកូវីដ-១៩ ចំនួន៥៤ប្រអប់តូច ជូនដល់ការិយាល័យសុខាភិបាលស្រុកប្រតិបត្តិស្រុកត្បូងឃ្មុំ
នាព្រឹកថ្ងៃទី១៧ ខែឧសភា ឆ្នាំ២០២៣ ក្រុមសមាជិកព្រឹទ្ធសភាប្រចាំភូមិភាគទី២ ដឹកនាំដោយឯកឧត្តម អ៊ុក ប៊ុនឈឿន ប្រធានក្រុម បានអញ្ជើញនាំយកឧបករណ៍តេស្តរហ័សកូវីដ-១៩ ចំនួន៥៤ប្រអប់តូច ផ្តល់ជូនដល់ការិយាល័យសុខាភិបាលស្រុកប្រតិបត្តិស្រុកត្បូងឃ្មុំ ខេត្តត្បូងឃ្មុំ ដោយមានការអញ្ជើញចូលរួមពីលោក នាដ រ៉ាវុធ ប្រធានសមាគមក្រុមប្រឹក្សាក្រុង-ស្រុក ឃុំ-សង្កាត់ នៃខេត្តត្បូងឃ្មុំ និងមន្រ្តីរាជការនៃអគ្គលេខាធិការដ្ឋានព្រឹទ្ធសភាអមដំណើរ ក្រុមសមាជិកព្រឹទ្ធសភាប្រចាំភូមិភាគទី២។
ឯកឧត្តម ប្រធានក្រុមសមាជិកព្រឹទ្ធសភាប្រចាំភូមិភាគទី២ បានបញ្ជាក់ថា ថ្វីត្បិតតែ ឧបករណ៍តេស្តរហ័សកូវីដ-១៩ ដែលបានយកមកផ្តល់ជូននាពេលនេះមានចំនួនតិចក៏ពិតមែន តែនេះគឺជាការចូលរួមចំណែកជាមួយនឹងការិយាល័យស្រុកប្រតិបត្តិសួង ក្នុងការប្រយុទ្ធប្រឆាំងនឹងជំងឺកូវីដ-១៩។ ជាមួយគ្នានេះ ឯកឧត្តម បានជំរុញបន្តការយកចិត្តទុកដាក់ប្រតិបត្តិឱ្យបានភ្ជាប់ខ្ជួននូវវិធានការសុខាភិបាលនានា ព្រមទាំងមានការប្រុងប្រយ័ត្នឱ្យបានខ្ពស់ចំពោះការរស់នៅជាមួយនឹងជំងឺកូវិដ-១៩ និងបន្តចូលរួមជាមួយនឹងរាជរដ្ឋាភិបាលក្នុងការចាក់ថ្នាំបង្ការជំងឺកូវីដ-១៩ឲ្យបានគ្រប់ៗគ្នា៕
ប្រភព៖នាយកដ្ឋានព័ត៌មាន
