នៅថ្ងៃទី២១ ខែឧសភា ឆ្នាំ២០២៣ វេលាម៉ោង ៩ព្រឹក ឯកឧត្តម ហែម ខន អនុប្រធានគណៈកម្មការទី១០ ព្រឹទ្ធសភា និងជាអនុប្រធានក្រុមសមាជិកព្រឹទ្ធសភាភូមិភាគ៧ បានអញ្ជើញជួបសំណេះសំណាលជាមួយក្រុមប្រឹក្សាឃុំ និងប្រជាពលរដ្ឋ នៅឃុំសែនដី ស្រុកសំរោងទង ខេត្តកំពង់ស្ពឺ ។ ក្នុងពិធីសំណេះសំណាល ឯកឧត្តមបានលើកឡើងពីគុណបំណាច់ ដែលបានបញ្ចប់សង្រ្គាម នាំសន្តិភាព និងដឹកនាំប្រទេសឱ្យមានការអភិវឌ្ឍរីកចម្រេីន និងបានណែនាំដល់មន្រ្តីភូមិឃុំ ត្រូវយកចិត្តទុកដាក់ត្រួតពិនិត្យសន្ទស្សន៍, ត្រួតពិនិត្យការរៀបចំក្រុមចលនាបោះឆ្នោត, ត្រួតពិនិត្យឯកសារអត្តសញ្ញាណ និងជាពិសេសត្រូវអនុវត្តការងារឱ្យដើរស្របតាមប្រតិទិនបោះឆ្នោតរបស់ គជប។ ក្នុងឱកាសនោះដែរឯកឧត្តមបានជូនវត្ថុកំដរដៃដល់ក្រុមប្រឹក្សាឃុំ និងមន្រ្តីភូមិទាំង ៦៦នាក់ ដោយក្នុងម្នាក់ៗទទួលបាន ក្រមា ចំនួន០១, សារ៉ុង ០១, ត្រីខ ០១កំប៉ុង, នំបុ័ង ០២ដើម និងទឹកសុទ្ធ ០១ដប។ សរុប ក្រមាចំនួន ៦៦, សារ៉ុងចំនួន ៦៦, ត្រីខ ចំនួន ៦៦កំប៉ុង , នំបុ័ង ១៣២ដើម និងទឹកសុទ្ធ ចំនួន ៦៦ដប។ បានឧបត្ថម្ភថវិកាចំនួន ១លានរៀល ជូនដល់រដ្ឋបាលឃុំសែនដី សម្រាប់ប្រើប្រាស់ក្នុងពេលយុទ្ធនាការបោះឆ្នោត។
