ព្រឹកថ្ងៃអាទិត្យ ១កើត ខែបឋមាសាឍ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៨ ខែមិថុនា ឆ្នាំ២០២៣ ឯកឧត្តមកិត្តិនីតិកោសលបណ្ឌិត ម៉ុម ជឹមហ៊ុយ ប្រធានគណៈកម្មការទី៧ និងជាអនុប្រធានក្រុមសមាជិព្រឹទ្ធសភាប្រចាំភូមិភាគទី១ បានអញ្ជើញចុះជួបសំណេះសំណាល និងសួរសុខទុកប្រជាពលរដ្ឋ ភូមិត្បែងមានជ័យ សង្កាត់ឳឡោក ខណ្ឌកំបូល រាជធានីភ្នំពេញ។ ឯកឧត្តមកិត្តិនីតិកោសលបណ្ឌិត បានសម្តែងការកោតសរសើរ និងថ្លែងអំណរគុណចំពោះបងប្អូនប្រជាពលរដ្ឋដែលបានចូលរួមអនុវត្តន៍ និងគាំទ្រគោលនយោបាយរាជរដ្ឋាភិបាល ក្រោមការដឹកនាំដ៏ត្រឹមត្រូវ ឈ្លាសវៃរបស់សម្តេចតេជោនាយករដ្ឋមន្រ្តី ទើបប្រទេសជាតិទទួលបានសុខសន្តិភាព ការអភិវឌ្ឍលើគ្រប់វិស័យ។ ជាមោទនភាពសម្រាប់ប្រជាពលរដ្ឋ ក៏ដូចជាប្រទេសជាតិទាំងមូល ដែលទទួលបាននូវការកោតសរសើរ និងវាយតម្លៃខ្ពស់ទាំងក្នុងតំបន់ និងឆាកអន្តរជាតិ ក្នុងការប្រយុទ្ធប្រឆាំងនិងជំងឺកូវីដ-១៩ ការរៀបចំកិច្ចប្រជុំកំពូលអាស៊ានលើកទី៤០-៤១ និងកិច្ចប្រជុំកំពូលពាក់ព័ន្ធ ការរៀបចំព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលព្រះរាជាណាចក្រកម្ពុជាទទួលធ្វើជាម្ចាស់ផ្ទះ។ សំណូមពរដល់បងប្អូនប្រជាពលរដ្ឋដែលគ្រប់អាយុបោះឆ្នោត សូមអញ្ជើញទៅបោះឆ្នោតឱ្យបានគ្រប់ៗគ្នា នាថ្ងៃអាទិត្យ ទី២៣ ខែកក្កដា ឆ្នាំ២០២៣ ដើម្បីបន្តរក្សាសន្តិភាព និងការអភិវឌ្ឍប្រទេសជាបន្តបន្ទាប់ទៀត។ ក្នុងឱកាសនោះ ឯកឧត្តមកិត្តិនីតិកោសលបណ្ឌិត ក៏បានឧបត្ថម្ភថវិកាមួយចំនួនផងដែរ។