នាព្រឹកថ្ងៃទី១២ ខែកក្កដា ឆ្នាំ២០២៣ គណៈប្រតិភូគណៈកម្មការទី៦ព្រឹទ្ធសភា ដឹកនាំដោយឯកឧត្តម អ៊ុក ប៊ុនឈឿន ប្រធានគណៈកម្មការទី៦ព្រឹទ្ធសភា បានអញ្ជើញដាក់កូរោនផ្កាគោរពវិញ្ញាណក្ខន្ធសពលោកជំទាវ មហាឧបាសិកាពុទ្ធសាសនូបត្ថម្តក៍ ទុំ សាលឿង ភរិយារបស់ឯកឧត្តម គឹម ធា លេខាធិការ គណៈកម្មការទី៦ព្រឹទ្ធសភា និងជាសមាជិក ក្រុមសមាជិកព្រឹទ្ធសភាប្រចាំភូមិភាគទី៦ ដែលបានទទួលមរណភាពកាលពីវេលាម៉ោង១០:៥៤នាទីព្រឹក ថ្ងៃចន្ទ ទី១០ ខែកក្កដា ឆ្នាំ២០២៣ ក្នុងជន្មាយុ៦៦ឆ្នាំ ដោយរោគាពាធ។
ក្នុងវេលាដ៏សែនក្រៀមក្រំនេះ សមាជិក សមាជិកាគណៈកម្មការទី៦ព្រឹទ្ធសភា សូមចូលរួមរំលែកទុក្ខជាមួយឯកឧត្តម គឹម ធា ព្រមទាំងក្រុមគ្រួសារ ចំពោះមរណភាពលោកជំទាវ មហាឧបាសិកាពុទ្ធសាសនូបត្ថម្តក៍ ទុំ សាលឿង ដែលជាការបាត់បង់គួរឱ្យសោកស្តាយបំផុតនូវឧត្តមភរិយា មាតា មាតាក្មេក ជីដូន និងសាច់ញាតិដ៏ល្អ ជាទីគោរពស្រលាញ់ពោរពេញទៅដោយព្រហ្មវិហាធម៌ដ៏ល្អប្រពៃ និងមិនចេះរីងស្ងួត ក្នុងការអប់រំកូនចៅទាំងអស់ប្រកបដោយការទទួលខុសត្រូវខ្ពស់បំផុត។
សូមជម្រាបថា៖ សពលោកជំទាវ មហាឧបាសិកាពុទ្ធសាសនូបត្ថម្តក៍ ទុំ សាលឿង ត្រូវបានតម្កល់ប្រារព្ធធ្វើបុណ្យតាមប្រពៃណីព្រះពុទ្ធសាសនា នៅផ្ទះលេខ២៦៦ ផ្លូវលេខ២១០ ភូមិវាលយន្ត សង្កាត់ស្វាយរៀង ក្រុងស្វាយរៀង ខេត្តស្វាយរៀង៕
ប្រភព៖ នាយកដ្ឋានព័ត៌មាន
