នារសៀលថ្ងៃទី១៣ ខែកញ្ញា ឆ្នាំ២០២៣ គណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ នៃព្រឹទ្ធសភា (គណៈកម្មការទី៧) ដឹកនាំដោយ ឯកឧត្តមកិត្តិនីតិកោសលបណ្ឌិត ម៉ុម ជឹមហ៊ុយ ប្រធានគណៈកម្មការ បានអញ្ជើញជួបពិភាក្សាការងារជាមួយមន្ទីរអប់រំ យុវជន និងកីឡា មន្ទីរធម្មការ និងសាសនា មន្ទីរវប្បធម៌ និងវិចិត្រសិល្បៈ មន្ទីរទេសចរណ៍ និងមន្ត្រីពាក់ព័ន្ធជុំវិញមន្ទីរទាំង៤ ដើម្បីឈ្វេងយល់ពីវឌ្ឍនភាពការងារ បញ្ហាប្រឈម ទិសដៅការងារបន្តរបស់មន្ទីរដែលវិស័យពាក់ព័ន្ធជាសមត្ថកិច្ចរបស់គណៈកម្មការ នៅសាលប្រជុំមន្ទីរអប់រំ យុវជន និងកីឡាខេត្តក្រចេះ។
ក្នុងឱកាសនោះ ឯកឧត្តមកិត្តិនីតិកោសលបណ្ឌិត ម៉ុម ជឹមហ៊ុយ បានថ្លែងអំណរគុណនិងកោតសរសើរចំពោះថ្នាក់ដឹកនាំនិងមន្ត្រីរាជការនៃមន្ទីរជំនាញពាក់ព័ន្ធវិស័យទាំង៤ ចំពោះការខិតខំបំពេញការងារ និងដោះស្រាយនូវបញ្ហាប្រឈមនានាដោយប្រសិទ្ធភាព ព្រមទាំងផ្តល់នូវអនុសាសន៍គន្លឹះមួយចំនួន ដើម្បីជាត្រីវិស័យសម្រាប់អនុវត្តការងារបន្តឱ្យសម្រេចបានតាមផែនការយុទ្ធសាស្ត្ររបស់ខ្លួន៕

ប្រភព៖នាយកដ្ឋានព័ត៌មាន