នារសៀលថ្ងៃទី០៣ ខែវិច្ឆិកា ឆ្នាំ២០២៣ លោកជំទាវ ជា ចន្ទទេវី សមាជិកាគណៈកម្ម ការទី៥ព្រឹទ្ធសភា ឯកឧត្តម សាយ សុផល ទីប្រឹក្សាផ្ទាល់របស់ឯកឧត្តមកិត្តិសង្គហបណ្ឌិត ទេព ងន អនុប្រធានទី២ព្រឹទ្ធសភា និងលោកជំទាវបានអញ្ជើញប្រារព្ធពិធីក្រុងពាលី សុំម្ចាស់ទឹក ម្ចាស់ដី សិរីជ័យមង្គល និងធ្វើបទនមស្ការព្រះរតនត្រ័យ សមាទានសីល និមន្តព្រះសង្ឃចម្រើនព្រះបរិត្ត ព្រមទាំងសម្ដែងព្រះធម៌ទេសនា ក្នុងពិធីបុណ្យអង្គកឋិនទានរស្មីសាមគ្គី នៅវត្តឧត្តមមានជ័យ សិរីមហាតេជោ (ហៅវត្តជ្រោះជ្រៅ) ស្ថិតក្នុងភូមិជ្រោះជ្រៅពោធិសាល ឃុំគ្រញូងសែនជ័យ ស្រុកស្នួល ខេត្តក្រចេះ។
ក្នុងប្រារព្ធពិធីនេះ មានការអញ្ជើញចូលរួមពីថ្នាក់ដឹកនាំខេត្ត អាជ្ញាធរមូលដ្ឋាន ស្រុក និងបុត្រា បុត្រី លោក លោកស្រី ព្រមទាំងពុទ្ធបរិស័ទចំណុះជើងវត្ត និងញាតិមិត្តជិតឆ្ងាយយ៉ាងច្រើនកុះករ។
អង្គកឋិនទានរស្មីសាមគ្គីនេះ ផ្តួចផ្តើមឡើងដោយបានមូលមតិគ្នាជាឯកច្ឆន្ទ ដើម្បីផ្សារភ្ជាប់វិស័យអាណាចក្រជាមួយពុទ្ធចក្រ ក្នុងការរួមចំណែកកសាងសមិទ្ធផលនានានៅក្នុងវត្តឧត្តមមានជ័យ សិរីមហាតេជោ (ហៅវត្តជ្រោះជ្រៅ) ដើម្បីលើកស្ទួយវិស័យសាសនា ជាសាសនារបស់រដ្ឋ។
ប្រភព៖ នាយកដ្ឋានព័ត៌មាន
