នាព្រឹកថ្ងៃទី១០ ខែមេសា ឆ្នាំ២០២៤ នៅវិមានព្រឹទ្ធសភា គណៈប្រតិភូគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃព្រឹទ្ធសភា (គណៈកម្មការទី២) ដឹកនាំដោយឯកឧត្តម ធន់ វឌ្ឍនា ប្រធានគណៈកម្មការ បានអញ្ជើញចូលជូនពរឯកឧត្តម អ៊ុច បូរឹទ្ធ អនុប្រធានទី២ព្រឹទ្ធសភា ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ពុទ្ធសករាជ២៥៦៨។
តាងនាមឱ្យសមាជិក សមាជិកា ព្រមទាំងមន្ត្រីលេខាធិការដ្ឋានអមគណៈកម្មការទី២ព្រឹទ្ធសភា ឯកឧត្តម ធន់ វឌ្ឍនា បានសម្ដែងនូវសេចក្តីគោរព និងរីករាយឥតឧបមា ដែលមានឱកាសបម្រើប្រទេសជាតិ និងប្រជាជាតិខ្មែរ ក្រោមការដឹកនាំរបស់ឯកឧត្តម អ៊ុច បូរឹទ្ធ អនុប្រធានទី២ព្រឹទ្ធសភា។ ឯកឧត្តមសន្យាថា នឹងខិតខំបំពេញការងារឱ្យអស់ពីកម្លាំងកាយចិត្ត ប្រកបដោយភាពច្នៃប្រឌិត ដើម្បីធានានូវប្រសិទ្ធភាពការងារខ្ពស់។ ទន្ទឹមគ្នានោះ ឯកឧត្តមបានគោរព និងសម្ដែងនូវការអបអរសាទរ ប្រកបដោយសេចក្តីសោមនស្សរីករាយយ៉ាងក្រៃលែង នាឱកាសដែលព្រឹទ្ធសភាបានបោះឆ្នោតជ្រើសតាំង ឯកឧត្តម អ៊ុច បូរឹទ្ធ ជាអនុប្រធានទី២ព្រឹទ្ធសភា ក្នុងសម័យប្រជុំដំបូងព្រឹទ្ធសភា នីតិកាលទី៥ ។
ក្នុងឱកាសដ៏ប្រពៃថ្លៃថ្លានេះ ឯកឧត្តមបានបួងសួងដល់គុណបុណ្យព្រះរតនត្រ័យ គុណកែវទាំងបី វត្ថុសក័សិទ្ធិក្នុងលោក និង់ទេវតាឆ្នាំថ្មី ព្រះនាម មហោទរាទេវី សូមជួយប្រោះព្រំសព្ទសាធុការពរជ័យ ជូនចំពោះ ឯកឧត្តមអនុប្រធានទី១ព្រឹទ្ធសភានិង លោកជំទាវ ព្រមទាំងក្រុមគ្រួសារ សូមបានសមប្រកបដោយពរប្រាំប្រការគឺអាយុ វណ្ណៈ សុខៈ ពលៈ និងបដិភាណ កុំបីឃ្លៀងឃ្លាតឡើយ៕

ប្រភព៖ នាយកដ្ឋានព័ត៌មាន