នាព្រឹកថ្ងៃទី១០ ខែមេសា ឆ្នាំ២០២៤ នៅវិមានព្រឹទ្ធសភា គណៈប្រតិភូគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃព្រឹទ្ធសភា (គណៈកម្មការទី៥) ដឹកនាំដោយ ឯកឧត្តមបណ្ឌិត ចែម វីឌ្យ៉ា ប្រធានគណៈកម្មការ បានអញ្ជើញចូលជូនពរឯកឧត្តម ប្រាក់ សុខុន អនុប្រធានទី១ព្រឹទ្ធសភា និងលោកជំទាវ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ពុទ្ធសករាជ២៥៦៨។
តាងនាមឱ្យសមាជិក សមាជិកា ព្រមទាំងមន្ត្រីលេខាធិការដ្ឋានអមគណៈកម្មការទី៥ព្រឹទ្ធសភា ឯកឧត្តមបណ្ឌិត ចែម វីឌ្យ៉ា បានសម្តែងនូវសេចក្តីសោមនស្សរីករាយយ៉ាងក្រៃលែង និងសូមចូលរួមអបអរសាទរក្នុងឱកាសដែលព្រឹទ្ធសភាបានបោះឆ្នោតជ្រើសតាំង ឯកឧត្តម ប្រាក់ សុខុន ជាអនុប្រធានទី១ ព្រឹទ្ធសភា ក្នុងសម័យប្រជុំដំបូងព្រឹទ្ធសភា នីតិកាលទី៥ ។ ជាមួយគ្នានេះឯកឧត្តមបណ្ឌិត សូមឧទ្ទិសបួងសួងដល់ទេពធីតាព្រះនាម មហោទរាទេវី ទេវតាឆ្នាំថ្មី និងវត្ថុស័ក្តិសិទ្ធិគ្រប់ទិសទី ពិសេសគុណបុណ្យបារមីព្រះរតនត្រ័យកែវទាំងបី តាមបីបាច់ថែរក្សា និងប្រោះព្រំសព្ទសាធុការពរ បវរសួស្តី ជ័យមង្គល វិបុលសុខ មហាប្រសើរគ្រប់ប្រការ ជូនចំពោះឯកឧត្តមអនុប្រធានទី១ព្រឹទ្ធសភា និងលោកជំទាវ ព្រមទាំងបុត្រាបុត្រី និងចៅប្រុស ចៅស្រីជាទីស្រឡាញ់ទាំងអស់ សូមប្រកបដោយសុខភាពល្អបរិបូរណ៍ កម្លាំងពលំមាំមួន ប្រាជ្ញាឈ្លាសវៃ ជន្មាយុយឺនយូរ និងសូមបានសមប្រកបនូវពុទ្ធពរទាំងប្រាំប្រការ អាយុ វណ្ណៈ សុខៈពលៈ និងបដិភានៈ កុំបីឃ្លៀងឃ្លាតឡើយ និងសូមគោរពជូនពរ ឯកឧត្តមមេត្តាទទួលបាននូវជោគជ័យថ្មីៗជាទីកត់សម្គាល់ថែមទៀត ជូនប្រជារាស្ត្រ និងប្រជាជាតិកម្ពុជា។
ប្រភព៖ នាយកដ្ឋានព័ត៌មាន
