នាព្រឹកថ្ងៃទី១៥ ខែឧសភា ឆ្នាំ២០២៤ ឯកឧត្តម ឈើយ ចាន់ណា លេខាធិការគណៈកម្មការទី៧ ព្រឹទ្ធសភា និងជាលេខាធិការក្រុមសមាជិកព្រឹទ្ធសភា ប្រចាំភូមិភាគទី៤ និងឯកឧត្តមឧកញ៉ា ភូ ពុយ អ្នកតំណាងរាស្ត្រមណ្ឌលខេត្តបាត់ដំបង បានអញ្ជើញជួបសំណេះសំណាលជាមួយប្រជាកសិករ ឃុំ ចំនួន០៤ គឺឃុំទ្រាស ឃុំស្វាយចេក ឃុំរលួស និងឃុំតាផូ ស្រុកស្វាយចេក ខេត្តបន្ទាយមានជ័យ ។ ក្នុងឱកាសនោះ ឯកឧត្តមបានជម្រាបជូនប្រជាកសិករ ពីការជ្រើសរើសពូជ ជាពូជសុទ្ធ មានគុណភាពល្អ ស្របតាមរដូវកាលភូមិសាស្រ្ត និងតម្រូវការទីផ្សារ ពិសេសពូជស្រូវផ្ការំដួល។ ជាមួយគ្នានេះផងដែរ ឯកឧត្តមបានពន្យល់ពីការរៀបចំសហគមន៍កសិករ មានអត្ថប្រយោជន៍ច្រើនណាស់ក្នុងការជួយឲ្យមានភាពប្រសើរឡើង គឺមានរចនាសម្ព័ន្ធគ្រប់គ្រងច្បាស់លាស់ បញ្ហាឧបសគ្គនិងកង្វល់ផ្សេងៗ ត្រូវបានដោះស្រាយរហ័ស ដូចជាបច្ចេកទេសដាំដុះ ពូជ ជី ការភ្ជួររាស់ ច្រូតកាត់ តម្លៃទីផ្សារ បម្រែបម្រួលផ្សេងៗទៀត។ល។ ក្នុងកម្មវិធីនេះ មានការចូលរួមពីលោកប្រធានក្រុមប្រឹក្សាស្រុក គណៈអភិបាលស្រុក និងលោកប្រធានការិយាល័យជំនាញក្នុងស្រុកផងដែរ។