នាព្រឹកថ្ងៃទី០៩ ខែមិថុនា ឆ្នាំ២០២៤ លោកជំទាវ ឃួន ឃុនឌី សមាជិកាគណៈកម្មការទី៨ ព្រឹទ្ធសភា និងជាអនុប្រធានក្រុមសមាជិកព្រឹទ្ធសភាប្រចាំភូមិភាគទី៨ រួមដំណើរដោយលោកជំទាវសមាជិកាក្រុមប្រឹក្សាខេត្ត លោកស្រីអនុប្រធានមន្ទីរកិច្ចការនារីខេត្ត និងថ្នាក់ដឹកនាំស្រុកប្រាសាទសំបូរ បានអញ្ជើញនាំយកនូវសម្ភារៈ និងថវិកាមួយចំនួន ចូលរួមរំលែកទុក្ខជាមួយគ្រួសារសពកុមារីឈ្មោះ អ៊ីន សុភ័ក្រ ភេទស្រី អាយុ ១៣ឆ្នាំ ជាសិស្សរៀនថ្នាក់ទី៧A នៃអនុវិទ្យាល័យឈូក ដែលបាត់បង់ជីវិត ក្នុងឧប្បត្តិហេតុលិចទូកចម្លង កាលពីព្រឹកថ្ងៃទី០៨ ខែមិថុនា ឆ្នាំ២០២៤ វេលាម៉ោង ១១:៣០ នាទីថ្ងៃត្រង់ ស្ថិតក្នុងភូមិសាស្រ្តឃុំឈូក ស្រុកប្រាសាទសំបូរ ខេត្តកំពង់ធំ។
ស្ថិតក្នុងឱកាសដ៏សោកសង្រេងនោះផងដែរ លោកជំទាវ បានសម្តែងនូវក្តីសង្វេគសោកស្តាយស្រណោះអាឡោះអាល័យជាពន់ពេក និងបានចូលរួមរំលែកមរណទុក្ខយ៉ាងក្រៀមក្រំបំផុត ជាមួយក្រុមគ្រួសារនៃសព ចំពោះការបាត់បង់កូនស្រីជាទីស្រឡាញ់ ក្នុងឧប្បត្តិហេតុដែលមិននឹកស្មានដល់នេះ។
