នាថ្ងៃទី២៤ ខែមិថុនា ឆ្នាំ២០២៤ នៅទីស្នាក់ការកណ្តាលកាកបាទក្រហមកម្ពុជា លោកជំទាវបណ្ឌិត អ៊ុក ម៉ាលី សមាជិកាគណៈកម្មការទី២ ព្រឹទ្ធសភា បានអញ្ជើញចូលរួមជាកិត្តិយសក្នុងពិធីបំពាក់គ្រឿងឥស្សរិយយសជូនមន្ត្រី បុគ្គលិកកាកបាទក្រហមកម្ពុជា ទីស្នាក់ការកណ្តាល និងសាខារាជធានី-ខេត្ត ក្រោមអធិបតីភាពដ៏ខ្ពង់ខ្ពស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ។
ក្នុងពិធីដ៏មានសារ:សំខាន់នេះ គ្រឿងឥស្សរិយយសចំនួន ៧១គ្រឿង បានប្រគល់ជូនមន្ត្រី បុគ្គលិកកាកបាទក្រហមកម្ពុជាចំនួន ៧១រូប សុទ្ធសឹងតែជាអ្នកធ្លាប់បានបម្រើការងារជូនកាកបាទក្រហមកម្ពុជារយៈពេលចាប់ពី ២០ឆ្នាំ ដល់ ៤០ឆ្នាំ។ នេះជាការលើកទឹកចិត្តដ៏ធំធេង និងបង្ហាញពីការយកចិត្តទុកដាក់ខ្ពស់ពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចំពោះមន្ត្រី បុគ្គលិក ដែលមានគុណបំណាច់ និងស្នាដៃ ព្រមទាំងលះបង់កម្លាំងកាយ ចិត្ត ប្រាជ្ញា ស្មារតី និងពេលវេលា បម្រើដល់សកម្មភាពមនុស្សធម៌របស់កាកបាទក្រហមកម្ពុជា។
