ដោយទទួលបានការណែនាំដ៏ខ្ពង់ខ្ពស់ពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នាថ្ងៃទី៨ ខែកក្កដា ឆ្នាំ២០២៤ លោកជំទាវបណ្ឌិត អ៊ុក ម៉ាលី សមាជិកាគណៈកម្មការទី២ ព្រឹទ្ធសភា បានអញ្ជើញនាំយកទៀន ធូប ផ្កាភ្ញី ថ្វាយព្រះរតនត្រ័យ និងនាំយកទេយ្យវត្ថុ បច្ច័យ វេរប្រគេនជូនព្រះសង្ឃគង់នៅវត្តប្រជុំនទី (ហៅវត្តក្រពើហា) ស្ថិតនៅសង្កាត់ព្រែកឫស្សី ក្រុងតាខ្មៅ ខេត្តកណ្តាល។

លោកជំទាវបណ្ឌិត បានអញ្ជើញនាំយកបច្ច័យ និងសម្ភាររបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា រួមមាន៖ បច្ច័យចំនួន ៤០លានរៀល និងទេយ្យវត្ថុ ទៀនព្រះវស្សា១គូ អង្ករ ៥តោន មី ៥០កេស ត្រីខ ៥កេសធំ ទឹកស៊ីអ៊ីវ ១០ឡូ ទឹកត្រី ១០ឡូ ទឹកក្រូច ១០កេស ទឹកសណ្តែក ១០កេស មៀនកំប៉ុង២កេស ទឹកសុទ្ធអារុណា ១០កេស ទឹកដោះគោខាប់ ២កេស អូរវ៉ាន់ទីន ២កេស ស្ករស ២៥គីឡូក្រាម តែ ៥គីឡូក្រាម ត្រីងៀត ១២គីឡូក្រាម សាច់ក្រក ១២គីឡូក្រាម ផ្លែឈើ ១កន្ត្រក ព្រមទាំងបច្ច័យព្រះចៅអធិការវត្ត ២លានរៀល ព្រះសង្ឃ៤អង្គ ៥០ម៉ឺនរៀលក្នុងមួយអង្គ និងសីលវ៍នសីវតី២០នាក់ ម្នាក់ក្រណាតស១ដុំ ថវិកា២០០០០រៀល៕

ឆ្លៀតក្នុងឱកាសនេះ ព្រះសិរីវិសុទ្ធិ បណ្ឌិត វ័ន្ត វណ្ណោ ព្រះរាជាគណៈថ្នាក់កិត្តិយស ព្រះលេខាធិការគណៈខេត្តកណ្តាល នាយកពុទ្ធិកវិទ្យាល័យប៊ុន រ៉ានី ហ៊ុនសែន ក្រពើហា និងជាព្រះចៅអធិការវត្តប្រជុំនទី បានថ្លែងអំណរគុណ និងកោតសរសើរចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលដឹកនាំកាកបាទក្រហមកម្ពុជាដោយយកចិត្តទុកដាក់ គិតគូរពីសុខទុក្ខរបស់ប្រជាពលរដ្ឋ និងតែងតែលើកទឹកចិត្ត ចូលរួមចំណែកលើកស្ទួយវិស័យព្រះពុទ្ធសាសនាឱ្យមានការរីកចម្រើន។