រសៀលថ្ងៃអាទិត្យ ទី២២ ខែកញ្ញា ឆ្នាំ២០២៤ ឯកឧត្តម ឈើយ ចាន់ណា លេខាធិការគណ:កម្មការទី៧ ព្រឹទ្ធសភា និងជាលេខាធិការក្រុមសមាជិកព្រឹទ្ធសភា ប្រចាំភូមិភាគទី៤ រួមជាមួយលោក ជាម សុខ ប្រធានក្រុមប្រឹក្សាក្រុងសិរីសោភ័ណ លោក ដា ទឹង ប្រធានក្រុមប្រឹក្សាស្រុកស្វាយចេក បានចូលរួមគោរពប្រតិបត្តិដោយចិត្តជ្រះថ្លា កាន់បិណ្ឌវេនថ្ងៃទី៦ ជាមួយសមាជិក សមាជិកាក្រុមប្រឹក្សាឃុំស្វាយចេក និងឃុំតាផូ ព្រមទាំងពុទ្ធបរិស័ទចំណុះជើងវត្តសម្បូរណ៍សាមគ្គីប្រាសាទមានជ័យ ស្ថិតឃុំតាផូ ស្រុកស្វាយចេក ខេត្តបន្ទាយមានជ័យ រួមគ្នាថ្វាយគ្រឿងសក្ការបូជា ទៀនធូប នមស្ការព្រះរតនត្រ័យ សមាទានសីល ស្វាធ្យាយព្រះធម៌ចម្រើនព្រះបរិត្ត ទទួលពរជយន្តោពុទ្ធជ័យមង្គល ស្តាប់ព្រះធម្មទេសនាប្រមូលផលបុណ្យ ដើម្បីឧទ្ទិសកុសលជូនដួងវិញ្ញាក្ខន្ធបុព្វបុរសជាតិ យុទ្ធជន យុទ្ធនារី ដែលបានពលីទៅកាន់លោកខាងមុខ និងសូមឧទ្ទិសបួងសួង ទេវតា វត្ថុស័ក្តិសិទ្ធិទិសទាំងប្រាំបី មេត្តាបីបាច់ថែរក្សាការពារព្រះរាជាណាចក្រកម្ពុជា ប្រជាជនកម្ពុជា បានរស់នៅសុខចម្រើនគ្រប់ប្រការក្រោមម្លប់នៃសុខសន្តិភាពពេញផ្ទៃប្រទេស ឲ្យបានគង់វង្សយូរអង្វែងរាប់រយពាន់ឆ្នាំរៀងរហូតតទៅ។