ព្រឹកថ្ងៃពុធ ទី២២ ខែមករា ឆ្នាំ២០២៥ វេលាម៉ោង៩ព្រឹក គណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃព្រឹទ្ធសភា (គណៈកម្មការទី៥) បានបើកកិច្ចប្រជុំផ្ទៃក្នុងគណៈកម្មការ ដឹកនាំដោយឯកឧត្តមបណ្ឌិត ចែម វីឌ្យ៉ា ដើម្បីពិនិត្យ ពិភាក្សា សេចក្តីសម្រេច តួនាទី ភារកិច្ច និងសមត្ថកិច្ច របស់គណៈកម្មការទី៥។ ឯកឧត្តមបណ្ឌិតប្រធានគណៈកម្មការបានជូនឯកឧត្តម ឆាយ វណ្ណា លេខាធិការគណៈកម្មការអានសេចក្តីសម្រេចស្តីពី តួនាទី ភារកិច្ច និងសមត្ថកិច្ច របស់គណៈកម្មការទី៥ ជូនអង្គប្រជុំពិនិត្យ។ ក្រោយពីបានស្តាប់ ឯកឧត្តមលេខាធិការ អានសេចក្តីសម្រេចរួចមក អង្គប្រជុំបានពិនិត្យ ពិភាក្សា យ៉ាងយកចិត្តទុកដាក់ទៅលើចំណុចនីមួយៗ និងខ្លឹមសាររួមនៃសេចក្តីសម្រេច។ ជាលទ្ធផល គណៈកម្មការបានឯកភាពសម្រេចកែសម្រួលខ្លឹមសារនៅក្នុងចំណុចនីមួយៗ និងបានលុបពាក្យ “ ឃោសនាការ ” និងលុបអក្សរកាត់ “ ឃ ” ចេញ សុំប្រើឈ្មោះជាផ្លូវការ គណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាននៃព្រឹទ្ធសភា ដើម្បីស្របទៅនឹងការអនុវត្ត តួនាទី ភារកិច្ច និងសមត្ថកិច្ច របស់គណៈកម្មការទី៥ និងដើម្បីឱ្យស្របទៅនឹងវិសោធនកម្មបទបញ្ជាផ្ទៃក្នុងព្រឹទ្ធសភា នៃព្រះរាជាណាចក្រកម្ពុជា ដែលព្រឹទ្ធសភាបានអនុម័ត នៅថ្ងៃទី១៤ ខែមករា ឆ្នាំ២០២៥ នាសម័យប្រជុំព្រឹទ្ធសភាជាវិសាមញ្ញ នីតិកាលទី៥ ត្រូវបានប្រកាសថា ស្របនឹងរដ្ឋធម្មនុញ្ញ។
