នារសៀលថ្ងៃទី៦ ខែមីនា ឆ្នាំ២០២៥ នៅសាលប្រជុំសាលាខណ្ឌជ្រោយចង្វារ ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា និងជាប្រធានក្រុមសមាជិកព្រឹទ្ធសភាប្រចាំភូមិភាគទី១ (ភ្នំពេញ) បានជួបសំណេះសំណាលជាមួយសមាជិកក្រុមប្រឹក្សាសង្កាត់ អាជ្ញាធរមូលដ្ឋាន និងអ្នកពាក់ព័ន្ធសរុបចំនួន១៣២នាក់ មកពី២៥សង្កាត់ នៃខណ្ឌជ្រោយចង្វារ ច្បារអំពៅ ប្ញស្សីកែវ និងព្រែកព្នៅ។
ពិធីសំណេះសំណាលនេះ ធ្វើឡើងដើម្បីស្វែងយល់ពីបញ្ហាប្រឈម និងសំណូមពរនៅមូលដ្ឋាន។ ក្នុងពិធីនេះ ឯកឧត្តមបណ្ឌិត បានគូសបញ្ជាក់អំពីបញ្ហាប្រឈម និងសំណូមពរសំខាន់ៗ ដែលត្រូវបានដោះស្រាយកន្លងមកដូចជា៖
១-ការសម្រេចបង្កើនមន្រ្ដីនគរបាលប៉ុស្ដិ៍រដ្ឋបាលឱ្យបានយ៉ាងតិច ១០នាក់/មួយឃុំ-សង្កាត់។
២-ការទម្លាក់ថវិកាឆ្នាំ២០២៥ សម្រាប់ការអភិវឌ្ឍមូលដ្ឋាន ជាមធ្យមប្រមាណ១១២ ០០០ដុល្លារ កើន១០,៩% ប្រៀបធៀបឆ្នាំ២០២៤។
២-ការផ្គត់ផ្គង់ទឹកស្អាតនៅសង្កាត់ព្រែកតាសេក បាក់ខែង និងកោះដាច់
ឆ្លៀតក្នុងឱកាសនេះ ឯកឧត្តមបណ្ឌិតបាន សូមអំពាវនាវដល់អាជ្ញាធរមូលដ្ឋាន៖
-បន្តប្រឹងប្រែងអនុវត្ត តាមយុទ្ធសាស្ត្របញ្ចកោណរបស់រាជរដ្ឋាភិបាល និងការណែនាំនានារបស់ សម្តេចធិបតី ហ៊ុន ម៉ាណែត ដើម្បីប្រយោជន៍ជាតិ និងប្រជាជនយើង បានទទួលនូវសន្តិភាព និងវឌុ្ឍនភាពបន្ដទៀត។
-បញ្ហាប្រឡាយបង្ហូរទឹកស្អុយពីបុរី ផ្លូវ និងភូមិចូលក្នុងទន្លេ សូមសហការជាមួយមន្ទីរបរិស្ថាន និងសាលារាជធានីភ្នំពេញ ដើម្បីដោះស្រាយបញ្ហានេះឱ្យបានឆាប់ ជូនប្រជាពលរដ្ឋ ដោយសារ “បញ្ហាទឹក និងបរិស្ថានរស់នៅស្អាត មានអនាម័យ” ជារឿងសំខាន់ណាស់ ដោយសារវាប៉ះពាល់សុខភាពផង និងសោភណភាពទីក្រុងដ៏ស្រស់ស្អាតរបស់យើង។
-រួមគ្នាលើកកម្ពស់សុខភាព និងអប់រំ។ យើងអាចមានគំនិតផ្សេងគ្នាលើបញ្ហាសុខភាព និងអប់រំ សម្រាប់ខ្ញុំ ខ្ញុំយល់ថា សុខភាពត្រូវការអាហាររូបត្ថម្ភ អប់រំត្រូវការអង់គ្លេស។
ខ្លឹមសារ៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន
