នាព្រឹកថ្ងៃសៅរ៍ ទី៨ ខែមីនា ឆ្នាំ២០២៥ ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា អមដំណើរដោយលោកជំទាវ ឃួន ឃុនឌី អនុប្រធានក្រុមសមាជិកព្រឹទ្ធសភាប្រចាំភូមិភាគទី៨ និងអាជ្ញាធរមូលដ្ឋាន បានអញ្ជើញដឹកនាំក្រុមគ្រូពេទ្យពិនិត្យមាត់ធ្មេញ ព្រមទាំងចែកច្រាសដុសធ្មេញ ថ្នាំដុសធ្មេញ សម្ភារៈសិក្សា និងទូរទស្សន៍ ជូនដល់សិស្សានុសិស្ស នៅសាលាបឋមសិក្សាកំពង់ស្វាយ រួមទាំងប្រគេនចង្ហាន់ព្រះសង្ឃក្នុងវត្តកំពង់ស្វាយ ស្ថិតនៅក្នុងភូមិកំពង់ស្វាយ ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ។ ឯកឧត្តមបណ្ឌិត បានបញ្ជាក់ថា ចំពោះទូរទស្សន៍ដែលសាលាបានទទួលនេះ គឺសម្រាប់ឱ្យកុមារ (ជាពិសេសកុមារ នៅតាមជនបទ) អាចរៀនភាសាអង់គ្លេសតាមកម្មវីធីអប់រំដែលមានជាច្រើនក្នុងប្រព័ន្ធអ៊ីនធឺណិត ដូចជា Youtube និង តាមគេហទំព័រ E-Learning ជាច្រើនទៀត ដែលបង្រៀនពីព្យញ្ជនៈ អនាម័យ សុខភាព វិទ្យាសាស្រ្ដជាដើម។ ក្នុងឱកាសនោះដែរ ឯកឧត្តមបណ្ឌិត ក៏បានផ្តាំផ្ញើដល់លោកគ្រូ អ្នកគ្រូ និងសិស្សានុសិស្ស ត្រូវយកចិត្តទុកដាក់លើកត្តាសំខាន់ពីរយ៉ាង ដើម្បីរួមចំណែកអភិវឌ្ឍខ្លួនផង និងប្រទេសជាតិផងនោះគឺ៖ “សុខភាព ត្រូវការអាហារូបត្ថម្ភ អប់រំត្រូវការអង់គ្លេស” ។
ប្រភព៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា រូបភាព៖ នាយកដ្ឋានព័ត៌មាន
