នាថ្ងៃទី៣១ ខែមីនា ឆ្នាំ២០២៥ នៅវិមានរដ្ឋសភា ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ប្រធានព្រឹទ្ធសភា បានអញ្ជើញថ្លែងសុន្ទរកថាបិទ ក្នុងសិក្ខាសាលាសភាថ្នាក់តំបន់ស្តីពី “បម្រែបម្រួលប្រជាសាស្រ្ត និងជំងឺមិនឆ្លង៖ គោលនយោបាយឆ្លើយតបបញ្ហាប្រឈម សម្រាប់ប្រជាជនសកម្ម និងយុវជន”។
ក្នុងឱកាសនេះ ឯកឧត្តមបណ្ឌិត បានលើកឡើងអំពីគោលនយោបាយរបស់ សម្ដេចតេជោ ប្រធានព្រឹទ្ធសភា និងជាអតីតនាយករដ្ឋមន្រ្ដី បានប្តេជ្ញាលើកកម្ពស់ការផ្តល់សេវាថែទាំសុខភាព ប្រកប ដោយគុណភាព សុវត្ថិភាព ប្រសិទ្ធភាព និងសមធម៌ជូនប្រជាជន។ បច្ចុប្បន្នកាល សម្តេចធិបតី នាយករដ្ឋមន្រ្តី បានបន្តសង្គតភាពគោលនយោបាយលើកកម្ពស់សុខភាព និងសុខុមាលភាពប្រជាជន ដោយផ្តោតលើការកាត់បន្ថយអត្រាឈឺ និងស្លាប់បណ្តាលមកពីជំងឺមិនឆ្លង និងការលើកកម្ពស់សុខភាពម្តាយ និងទារក កុមារ និងការទទួលបានសេវាថែទាំសុខភាពទូទៅ។
ឯកឧត្តមបណ្ឌិត បានលើកអំពីប្រទេសជាច្រើននៅលើពិភពលោក កម្ពុជា ប្រឈមនឹងជំងឺមិនឆ្លងចម្បង ៣ គឺ៖ ជំងឺទឹកនោមផ្អែម មហារីក និងសម្ពាធឈាមខ្ពស់ ដែលបណ្តាលមកពីកត្តាហានិភ័យចម្បងប្រាំ រួមមាន៖ របបអាហារមិនមានសុខភាព (ផ្អែម ប្រៃ ខ្លាញ់) កង្វះសកម្មភាពរាងកាយ ការប្រើប្រាស់ផលិតផលថ្នាំជក់ ភេសជ្ជៈថាមពល និងគ្រឿងស្រវឹង ប្រកបដោយគ្រោះថ្នាក់។ យោងតាមលទ្ធផលសន្និបាតសុខាភិបាលកម្ពុជា នៅក្នុងឆ្នាំ២០២៤ ក្នុងនោះ ការប្រើប្រាស់សេវាជំងឺទឹកនោមផ្អែមកើនឡើង ៥៩% និងជំងឺលើសឈាមកើនឡើង ២១%។
ជាមួយគ្នានោះដែរ ឯកឧត្តមបណ្ឌិត បានគូសបញ្ជាក់ថា ស្ថិតក្រោមដំបូលសន្តិភាព និងវឌ្ឍនភាពនានា ដែលយើងកំពុងទទួលបាន យើងគួររួមគ្នាជំរុញការងារ២សំខាន់៖
– សុខភាព៖ ខ្មែរប្រែពី ដាច់បាយ ទៅ ផ្តាច់បាយ ពោលគឺប្រែពី មានហូបតិចពេក ទៅមានហូបច្រើនពេក ហើយយើងឃើញមានចំនួនមនុស្សធាត់បានកើនឡើង ដោយសារចូលចិត្តអាហារមានស្ករ អំបិល និងខ្លាញ់ច្រើន។
– អប់រំ ៖ បង្រៀនប្រជាពលរដ្ឋ ឱ្យចេះ និងចេះស្រាវជ្រាវ លើការថែទាំសុខភាព ហើយក្នុងន័យនេះ ភាសាអង់គ្លេស គឺជាភាសាអាទិភាព សម្រាប់ការស្រាវជ្រាវផ្នែកសុខភាព វិទ្យាសាស្រ្ត និងការធ្វើជំនួញ។
ខ្លឹមសារ៖ ខុទ្ទកាល័យឯកឧត្តមអនុប្រធានទី២ ព្រឹទ្ធសភា
រូបភាព៖ នាយកដ្ឋានព័ត៌មាន