នារសៀលថ្ងៃព្រហស្បតិ៍ ១០កើត ខែមាឃ សំរឹទ្ធិស័ក ព.ស ២៥៦២ ត្រូវនឹងថ្ងៃទី១៤ ខែកុម្ភៈ ឆ្នាំ២០១៩ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា បានអញ្ជើញជួបសួរសុខទុក្ខ ប្រជាពលរដ្ឋ ជាសាសនិកឥស្លាមចំនួនប្រមាណ៣០០នាក់ នៅវិហារ កូឡាលោម ក្នុងភូមិ២ និងអាជ្ញាធរសង្កាត់ជ្រោយចង្វារ នៃខណ្ឌជ្រោយចង្វារ រាជធានីភ្នំពេញ… ។
បន្ទាប់ពីបានស្តាប់ លោកចៅសង្កាត់ និងហាកឹមតំណាងប្រជាពលរដ្ឋ ជម្រាបរាយការណ៍ អំពីសភាពការណ៍សន្តិសុខ សណ្តាប់ធ្នាប់ និងបញ្ហាប្រតិបត្តិកិច្ចការសាសនា នៅវិហារកូឡាលោមកន្លងមក រួមទាំងជីវភាពរស់នៅប្រចាំថ្ងៃ ការប្រកបមុខរបររកស៊ី និងធ្វើការងាររបស់បងប្អូនផងដែរនោះ សម្តេចភក្តី ក៏បាននាំនូវការផ្តាំផ្ញើសួរសុខទុក្ខពីថ្នាក់ដឹកនាំ ជូនចំពោះបងប្អូន… ហើយព្រមជាមួយនេះ សម្តេច ក៏បានជម្រាបជូនអំពីសភាពការណ៍វិវត្តន៍រីកចម្រើនថ្មីៗរបស់ប្រទេសជាតិ និងបើកបង្ហាញពីឧបាយកលពិសពុលដែលក្រុមប្រឆាំង គាំទ្រដោយកម្លាំងអមិត្តទាំងក្នុង ទាំងក្រៅប្រទេស ប៉ុនប៉ងធ្វើឲ្យមានការជ្រួលច្របល់ បាត់ស្ថេរភាពនយោបាយ… និងបាត់ជំនឿមកលើរាជរដ្ឋាភិបាលបច្ចុប្បន្ន ផងដែរ។
មុនបញ្ចប់ សម្តេចក៏បានផ្តាំផ្ញើ សូមអាជ្ញាធរសង្កាត់ ភូមិ និងបងប្អូនប្រជាពលរដ្ឋ រួមសាមគ្គីឯកភាពគ្នាទាំងការគោរពប្រតិបត្តិកិច្ចការសាសនា ទាំងការលើកកម្ពស់ជីវភាពរស់នៅ ការងារ និងរួមគ្នាកសាងអភិវឌ្ឍប្រទេសជាតិ អោយកាន់តែរីកចម្រើនឡើង ជាពិសេសការពារសុខសន្តិភាពរបស់សង្គមជាតិយើងសព្វថ្ងៃ ដែលយើងទាំងអស់គ្នាបានខិតខំប្រឹងប្រែង និងពុះពាររាល់ឧបសគ្គការលំបាកយ៉ាងច្រើនមហិមា ទើបទទួលបានដូចសព្វថ្ងៃនេះ…។( វិហារ កូឡាលោម )
