នាព្រឹកថ្ងៃទី៨ ខែមេសា ឆ្នាំ២០២៥ ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា បានដឹកនាំកិច្ចប្រជុំជាមួយប្រធានគណៈកម្មការទាំង១០ នៃព្រឹទ្ធសភា ប្រធានក្រុមភូមិភាគទាំង៨ សមាជិកានិងប្រធានគណៈកម្មការក្រមសីលធម៌សមាជិកសភារបស់សមាជិកព្រឹទ្ធសភា ក្រោមរបៀបវារៈ៖
១.បូកសរុបលទ្ធផលការងារចន្លោះសម័យប្រជុំ
២.ការពង្រឹងគណនេយ្យភាពសមាជិកព្រឹទ្ធសភា ជាមួយអង្គបោះឆ្នោត។
ជាកិច្ចចាប់ផ្តើម ឯកឧត្តមបណ្ឌិត អនុប្រធានទី២ ព្រឹទ្ធសភា បានសម្តែងការស្វាគមន៍យ៉ាងកក់ក្តៅដល់ឯកឧត្តម លោកជំទាវ សមាជិកព្រឹទ្ធសភា និងអង្គប្រជុំទាំងមូល។ នេះជាកិច្ចប្រជុំលើកទី៤ ដែលត្រូវបានធ្វើឡើងជារៀងរាល់ខែ ដើម្បីស្តាប់មតិយោបល់ជុំវិញការអនុវត្តមុខងារស្នូលរបស់សមាជិកព្រឹទ្ធសភា គឺមុខងារនីតិកម្ម មុខងារតំណាង និងតាមដានការអនុវត្តច្បាប់។
ឯកឧត្តមបណ្ឌិត បានសង្កត់ធ្ងន់ពីការអនុវត្តអាទិភាពសំខាន់ពីរ ដែលបានដាក់ចេញដោយ សម្តេចអគ្គមហាសេនាបតីតេជោ ប្រធានព្រឹទ្ធសភា គឺ ការទូតសភា និងការជំរុញគណនេយ្យភាពចំពោះអង្គបោះឆ្នោត។ ឯកឧត្តមបណ្ឌិត បានបញ្ជាក់ថា កិច្ចប្រជុំនេះ គឺធ្វើឡើងដើម្បីប្រមូលធាតុចូល កសាងរបាយការណ៍ជូនថ្នាក់ដឹកនាំ លើលទ្ធផលនៃការអនុវត្តមុខងារតំណាង ការជំរុញគណនេយ្យភាពចំពោះអង្គបោះឆ្នោត បញ្ហាប្រឈម និងដំណោះស្រាយ។
ឯកឧត្តម លោកជំទាវ ជាប្រធានគណៈកម្មការទាំង១០នៃព្រឹទ្ធសភា និងប្រធានក្រុមភូមិភាគទាំង៨ បានចូលរួមពិភាក្សា ប្រឹក្សាយោបល់យ៉ាងផុសផុលអំពី ឧត្តមានុវត្តន៍ បទពិសោធន៍នៃការអនុវត្តមុខងារតំណាង បញ្ហាប្រឈម និងដំណោះស្រាយបឋម ។
ឯកឧត្តមបណ្ឌិតអនុប្រធានទី២ បានបូកសរុបលទ្ធផលនៃកិច្ចពិភាក្សា ដោយវាយតម្លៃខ្ពស់ និងកោតសរសើរយ៉ាងស្មោះស្ម័គ្រចំពោះ ឯកឧត្តម លោកជំទាវជាប្រធានគណៈកម្មការទាំង១០ នៃព្រឹទ្ធសភា ប្រធានក្រុមភូមិភាគទាំង៨ សមាជិកានិងប្រធានគណៈកម្មការក្រមសីលធម៌សភារបស់សមាជិកព្រឹទ្ធសភា និងសមាជិកព្រឹទ្ធសភាគ្រប់ៗរូប ដែលបានខិតខំបំពេញតួនាទី ភារកិច្ចយ៉ាងសកម្ម និងមានលទ្ធផលជាក់ស្តែងជាច្រើន៕
ខ្លឹមសារ៖ ខុទ្ទកាល័យឯកឧត្តមអនុប្រធានទី២ ព្រឹទ្ធសភា
រូបភាព៖ នាយកដ្ឋានព័ត៌មាន
