នាព្រឹកថ្ងៃសុក្រ ទី២៥ ខែមេសា ឆ្នាំ២០២៥ ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា អមដំណើរដោយឯកឧត្តម ប៉ុល លឹម និងក្រុមសមាជិកព្រឹទ្ធសភាប្រចាំភូមិភាគទី៤ បានអញ្ជើញជាអធិបតីដ៏ខ្ពង់ខ្ពស់ ក្នុងពិធីសម្ពោធអគារសិក្សាថ្មី ១ ខ្នង ៥ បន្ទប់ នៅវិទ្យាល័យខ្នារទ័ពជ័យ ភូមិខ្នារទ័ពជ័យ ឃុំបឹងមាលា ស្រុកស្វាយលើ ខេត្តសៀមរាប។
អគារសិក្សាថ្មីនេះ មិនមែនគ្រាន់តែជាហេដ្ឋារចនាសម្ព័ន្ធរូបវន្តប៉ុណ្ណោះទេ ប៉ុន្តែជាពន្លឺនៃក្តីសង្ឃឹម និងជាឱកាសសម្រាប់សិស្សានុសិស្ស បន្តពង្រីកចំណេះដឹងទាំងអក្សរសាស្រ្ត គណិតវិទ្យា និងវិទ្យាសាស្រ្ត ដើម្បីក្លាយទៅជាមូលធនមនុស្សដ៏មានតម្លៃរបស់ប្រទេស នាពេលអនាគត។
ឯកឧត្តមបណ្ឌិត បានថ្លែងកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់អាជ្ញាធរមូលដ្ឋាន អង្គការបណ្ដុះបណ្ដាលដើម្បីការអភិវឌ្ឍធនធានមនុស្ស លោក INOUE TOYOAKI ប្រធានមូលនិធិអន្តរជាតិ INOUE និងសប្បុរសជននានា ក្នុងការសាងសង់អគារសិក្សាថ្មីនេះ ដែលជាការចូលរួមចំណែកជាមួយរាជរដ្ឋាភិបាល ក្នុងការអភិវឌ្ឍធនធានមនុស្សនៅកម្ពុជា។
ឯកឧត្តមបណ្ឌិត បានលើកពីគុណបំណាច់ដ៏ធំធេងរបស់ ព្រះករុណាព្រះបាទសម្ដេចព្រះបរមនាថ នរោត្តម សីហមុនី, សម្ដេចតេជោ ហ៊ុន សែន ប្រធានព្រឹទ្ធសភា, សម្ដេចធិបតី ហ៊ុន ម៉ាណែត ដែលតែងតែយកព្រះទ័យ និងយកចិត្តទុកដាក់ខ្ពស់ក្នុងការអភិវឌ្ឍធនធានមនុស្សនៅកម្ពុជា ឱ្យបានកាន់តែច្រើន។
នៅក្នុងឱកាសនោះផងដែរ ឯកឧត្តមបណ្ឌិត បានជំរុញឱ្យសិស្សានុសិស្សខិតខំប្រឹងប្រែងរៀនសូត្រ និងអភិវឌ្ឍខ្លួនឱ្យរឹងមាំ ទើបអាចជួយគ្រួសារ និងសង្គមជាតិបាន។
ខ្លឹមសារ៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន
