នាថ្ងៃទី២ ខែឧសភា ឆ្នាំ២០២៥ ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា បានដឹកនាំគណៈប្រតិភូព្រឹទ្ធសភា ចូលទស្សនារោចក្រកែច្នៃស្វាយចន្ទី (Welwilling Agricultural Technology Cambodia) ស្ថិតនៅក្នុងស្រុកកំពង់សៀម ខេត្តកំពង់ចាម ដែលជារោងចក្រកែច្នៃគ្រាប់ស្វាយចន្ទីធំមួយនៅកម្ពុជា ដោយក្នុងមួយឆ្នាំរោងចក្រអាចប្រមូលទិញគ្រាប់ស្វាយចន្ទីប្រមាណ ១០ម៉ឺនតោន និងកែច្នៃជាផលិតផលសម្រេចបានប្រមាណ ៣ ៥០០តោន។
កម្ពុជា ជាប្រទេសឈានមុខគេ ក្នុងការផលិតគ្រាប់ស្វាយចន្ទី ដោយក្នុងមួយឆ្នាំ កម្ពុជាអាចផលិតគ្រាប់ស្វាយចន្ទីចន្លោះពី ៧០ម៉ឺន-៨០ម៉ឺនតោន និងអាចរកចំណូលបានប្រមាណ ១ពាន់លានដុល្លារ/ឆ្នាំ។ កម្ពុជាមានផ្ទៃដីប្រមូលផលស្វាយចន្ទីសរុបចំនួនជាង ៥៨ម៉ឺនហិកតា (៥៨០ ១១៧) ក្នុងនោះខេត្តចំនួន ១០ របស់កម្ពុជា មានផ្ទៃដីដាំដុះស្វាយចន្ទីច្រើនជាងគេ រួមមាន ខេត្តកំពង់ធំជិត ១៥ ម៉ឺនហិកតា (១៤៧ ៧០៣) ខេត្តក្រចេះជាង ១០ម៉ឺនហិកតា (១០២ ៥២០) រតនគិរី ៩៧ ២៥៨ហិកតា កំពង់ចាម ៤៦ ៥៨២ហិកតា ស្ទឹងត្រែង ៤៤ ២៥០ហិកតា ខេត្តត្បូងឃ្មុំ ៣៦ ៤០៣ហិកតា ខេត្តសៀមរាប ៣៥ ៩១៤ហិកតា ខេត្តព្រះវិហារ ២៨ ៩៦៥ហិកតា ឧត្តរមានជ័យ ១៣ ៨១៨ហិកតា និងមណ្ឌលគិរី ៩ ៨៥៨ហិកតា (យោងតាមទិន្នន័យរបស់ក្រសួងកសិកម្ម រុក្ខាប្រមាញ់ និងនេសាទ)។ គិតត្រឹមខែឧសភានេះ ការប្រមូលផលគ្រាប់ស្វាយចន្ទី សម្រេចបានប្រមាណ ៧០% ខណៈតម្លៃមានភាពល្អប្រសើរ គឺចន្លោះពី ៤៨០០-៥២០០រៀល/គីឡូក្រាម ទៅតាមតំបន់ និងគុណភាពគ្រាប់។
ខ្លឹមសារ៖ ខុទ្ទកាល័យឯកឧត្តមអនុប្រធានទី២ ព្រឹទ្ធសភា
