នាព្រឹកថ្ងៃទី៦ ខែឧសភា ឆ្នាំ២០២៥ ឯកឧត្តមបណ្ឌិត ធន់ វឌ្ឍនា ប្រធានស្តីទីព្រឹទ្ធសភា បានដឹកនាំកិច្ចប្រជុំជាមួយឯកឧត្តម លោកជំទាវ ជាប្រធានគណៈកម្មការទាំង១០ ក្រុមសមាជិកភូមិភាគទាំង៨ ក្រុមសមាជិកាព្រឹទ្ធសភា និងគណៈកម្មការក្រមសីលធម៌សភារបស់ព្រឹទ្ធសភា ក្រោមរបៀបវារៈ៖
១. ពិភាក្សាអំពីគណនេយ្យភាពនៅតាមភូមិភាគ
២.ពិភាក្សាអំពីការត្រៀមលក្ខណៈចូលរួមសមាជរដ្ឋសភា និងព្រឹទ្ធសភា។
ឯកឧត្តមបណ្ឌិត បានលើកទឹកចិត្តឱ្យក្រុមភូមិភាគនីមួយៗបន្តតាមដានស្វែងយល់បញ្ហាប្រឈម សំណូមពរ និងស្វែងរកដំណោះស្រាយជូនមូលដ្ឋាន ដោយប្រើប្រាស់ពណ៌សម្រាប់កំណត់វឌ្ឍនភាពការងារ ព្រមទាំងកត់ត្រាកាលបរិច្ឆេទរាល់បញ្ហាត្រូវបានដោះស្រាយ ដើម្បីបូកសរុបប្រចាំឆ្នាំ។
អង្គប្រជុំក៏បានពិភាក្សាពីការបែងចែកក្រុមសមាជរដ្ឋសភានិងព្រឹទ្ធសភា របស់សមាជិកព្រឹទ្ធសភា ដើម្បីសិក្សាស្រាវជ្រាវឱ្យបានស៊ីជម្រៅលើប្រធានបទសមាជនេះ ក៏ដូចជាការរៀបចំកិច្ចប្រជុំពិភាក្សាគ្នាជាមុនដើម្បីពិភាក្សាវឌ្ឍនភាពការងារ ក្នុងការត្រៀមខ្លួនឱ្យបានរួចរាល់សម្រាប់ការប្រជុំសមាជនាពេលខាងមុខ។
ខ្លឹមសារ៖ ខុទ្ទកាល័យអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន
