នាល្ងាចថ្ងៃអាទិត្យ ទី១១ ខែឧសភា ឆ្នាំ២០២៥ ឯកឧត្ដម ឈើយ ចាន់ណា លេខាធិការគណៈកម្មការទី៧ ព្រឹទ្ធសភា និងជាលេខាធិការក្រុមសមាជិកសភា ប្រចាំភូមិភាគទី៤ ឯកឧត្ដម អន ស៊ុ សមាជិកក្រុមសមាជិកព្រឹទ្ធសភា ប្រចាំភូមិភាគទី៤ បានអញ្ជើញជាធិបតីពិធីសំណេះសំណាលជាមួយលោកគ្រូ អ្នកគ្រូ និងសិស្សសាលាសេហ្វ ហេវ៉ិន ស្ថិតនៅភូមិកូនដំរី សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។ ក្នុងកម្មវិធីនេះ ឯកឧត្ដម បានថ្លែងអំណរគុណដល់លោក អ៊ិន ជំនោរ នាយកអង្គការកម្ពុជា នៃក្ដីសង្ឃឹម និងជានាយកសាលាសេហ្វ ហេវ៉ិន ដែលបានរៀបចំកម្មវិធី និងផ្ដល់កិត្តិយសក្នុងការសំណេះសំណាលសួរសុខទុក្ខដល់លោកគ្រូ អ្នកគ្រូ និងសិស្សស្នាក់នៅក្នុងសាលា និងមានអាហារសាមគ្គី។ ក្នុងនេះមានការអញ្ជើញចូលរួមពី ឧត្ដមសេនីយ៍ឯក អឿម សំអាត អតីតនាយករងទីចាត់ការការងារព្រំដែន អគ្គបញ្ជាការដ្ឋាន នៃកងយោពលខេមរភូមិន្ទ បច្ចុប្បន្ននាយទាហានបំរុង ឧត្ដមសេនីយ៍ត្រី ហ៊ាង រតន៍ នាយសេនាធិការរង យោធភូមិភាគទី៥ លោកស្រី វរសេនីយ៍ឯក អៀង ច័ន្ទធី មេបញ្ជាការរងតំបន់ប្រតិបត្តិការសឹករងខេត្តបាត់ដំបងផងដែរ។
