នាព្រឹកថ្ងៃទី១២ ខែកក្កដា ឆ្នាំ២០២៥ លោកជំទាវបណ្ឌិត អ៊ុក ម៉ាលី សមាជិកាគណៈកម្មការទី២ព្រឹទ្ធសភា និងឯកឧត្តមបណ្ឌិត ម៉ា ឈឿន អ្នកតំណាងរាស្រ្តមណ្ឌលកំពង់ចាម បានអញ្ជើញជាធិបតីក្នុងពិធីសម្ពោធសមិទ្ធផលនានា ក្នុងវិទ្យាល័យ ហ៊ុនសែន ជើងឆ្នុក និងសាលាបឋមសិក្សាជើងឆ្នុក ស្ថិតក្រុងភូមិជើងឆ្នុក ឃុំតាំងក្រាំង ស្រុកបាធាយ ខេត្តកំពង់ចាម។
ក្នុងឱកាសនេះ ឯកឧត្តមបណ្ឌិត និងលោកជំទាវបណ្ឌិត បានសំណូមពរឱ្យជាអាជ្ញាធរមូលដ្ឋាន និងអ្នកពាក់ព័ន្ធចូលរួមថែរក្សាសមិទ្ធិផលនានាក្នុងសាលាទាំងពីរនេះ ក៏ដូចជាសមិទ្ធិផលនានាក្នុងមូលដ្ឋានផងដែរ ជាពិសេសចូលរួមថែរក្សាសុខសន្តិភាពដ៏មានតម្លៃមិនអាចកាត់ថ្លៃបាន ដែលជាកត្តាដ៏សំខាន់នាំមកនូវការអភិវឌ្ឍ និងភាពរីកចម្រើនដូចសព្វថ្ងៃ។ បន្ថែមពីលើនេះ បានឧបត្ថម្ភថវិកាជូនប្រជាជន កងកម្លាំង សេនាជន និងសិស្សានុសិស្ស ចំនួន ៧០០នាក់ ដោយក្នុងម្នាក់ទទួលបានថវិកា ២០,០០០រៀល។
សូមជ្រាបជូនផងដែរថា វិទ្យាល័យ និងបឋមសិក្សាខាងលើត្រូវបាន ឯកឧត្តមបណ្ឌិត និងលោកជំទាវបណ្ឌិត ជួយកសាង និងឧបត្ថម្ភបន្តបន្ទាប់ជាពីរដំណាក់កាល ដោយចំណាយថវិកាផ្ទាល់ខ្លួន សរុបចំនួន ១៧៤,៦០៦.២៥ដុល្លាអាមេរិក ក្នុងនោះ ដំណាក់កាលទី១ ឆ្នាំ២០១៩ ចំណាយថវិកា ៥,១៧០២ដុល្លារអាមេរិក និងដំណាក់កាលទី២ ឆ្នាំ២០២៥ ចំណាយថវិកា ១២២,៩០៤.២៥ដុល្លារអាមេរិក។
ប្រភព៖ ការិយាល័យជំនួយការគណៈកម្មការទី២ព្រឹទ្ធសភា
