ក្រុមសមាជិកព្រឹទ្ធសភាប្រចាំភូមិភាគទី៣ គោរពវិញ្ញាណក្ខន្ធសពលោកអនុសេនីយ៍ត្រី រិន វាសនា ពលីជីវិតក្នុងបុព្វហេតុប្រយុទ្ធលើសមរភូមិជាមួយសៀមឈ្លានពាន
នាព្រឹកថ្ងៃពុធ ទី៣០ ខែកក្កដា ឆ្នាំ២០២៥
ក្រុមសមាជិកព្រឹទ្ធសភាប្រចាំភូមិភាគទី៣ ដឹកនាំដោយឯកឧត្តម ម៉ម ប៊ុននាង ប្រធានក្រុម បានអញ្ជើញគោរពវិញ្ញាណក្ខន្ធសពលោកអនុសេនីយ៍ត្រី រិន វាសនា វីរៈយុទ្ធជនស្នេហាជាតិ ដែលបានពលីជីវិតក្នុងបុព្វហេតុប្រយុទ្ធលើសមរភូមិជាមួយសៀមឈ្លានពាន នៅសមរភូមិទិសមុំបី ខេត្តព្រះវិហារ ដើម្បីការពារបូរណភាពទឹកដីកម្ពុជា កាលពីថ្ងៃទី២៧ ខែកក្កដា ឆ្នាំ២០២៥ វេលាម៉ោង១៨:៣០នាទីល្ងាច ក្នុងជន្មាយុ២៨ឆ្នាំ។
ក្នុងឱកាសនោះក្រុមសមាជិកព្រឹទ្ធសភាប្រចាំភូមិភាគទី៣ បានចូលបច្ច័យក្នុងពិធីបុណ្យសពថវិកា៥លានរៀល និងលោកជំទាវ ម៉ម ប៊ុនលីនណា ទីប្រឹក្សាឯកឧត្តមអនុប្រធានទី១ ព្រឹទ្ធសភា បានចូលបច្ច័យ៦០ម៉ឺនរៀល។
សពរបស់លោកអនុសេនីយ៍ត្រី រិន វាសនា ត្រូវបានតម្កល់ធ្វើបុណ្យទក្ខិណានុប្បទាន តាមប្រពៃណីព្រះសាសនា នៅភូមិត្រពាំងត្រាច ឃុំដំណាក់អំពិល ស្រុកអង្គស្នួល ខេត្តកណ្តាល។
ប្រភព៖ នាយកដ្ឋានព័ត៌មាន
