នាព្រឹកថ្ងៃទី៣០ ខែកក្កដា ឆ្នាំ២០២៥ ឯកឧត្តម យស ផានីត្តា ប្រធានគណៈកម្មការទី២ព្រឹទ្ធសភា អមដំណើរដោយ ឯកឧត្តម ឈួន ឡេង ឯកឧត្តម គិន ណែត និងឯកឧត្តម ញ៉ូវ សុង សមាជិកគណៈកម្មការទី២ព្រឹទ្ធសភា បានអញ្ជើញនាំយកសម្ភារៈ បរិក្ខារមួយចំនួនជូនដល់ជនភៀសសឹកពីតំបន់ប្រយុទ្ធសមរភូមិមុខ នៅមណ្ឌលសុវត្ថិភាព វត្តពោធិ៍៥០០០ដើម ខេត្តព្រះវិហារ។
សម្ភារៈទាំងនោះរួមមាន៖ សេរ៉ូម និងបរិក្ខារពេទ្យមួយចំនួនធំប្រគល់ជូនទីបញ្ជាការស្រាលមណ្ឌលសុវត្ថិភាព វត្តពោធិ៍៥០០០ដើម សម្រាប់ដល់ជូនផ្នែកជំនាញសង្គ្រោះប្រជាជន ចំណែកអាវភ្លៀង ១៥០០អាវ និងសំពត់តង់ធុនធំ ចំនួន៥០ របស់គណៈកម្មការទី២ព្រឹទ្ធសភា បានយកទៅចែកជូនប្រជាពលរដ្ឋតាមស្នាក់ការឃុំ ដែលគ្រប់គ្រងជនភៀសសឹកចំនួន ៧ទីតាំង។

ជាមួយនោះ ឯកឧត្តមប្រធានគណៈកម្មការ និងសមាជិកទាំអស់ បានពាំនាំនូវការផ្តាំផ្ញើសួរសុខទុក្ខ និងការយកចិត្តទុកដាក់ព្រួយបារម្ភរបស់ថ្នាក់ដឹកនាំព្រឹទ្ធសភា ជាពិសេសសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ចំពោះបងប្អូនជនភៀសសឹកទាំងអស់ និងជូនពរឱ្យបងប្អូនមានសុវត្ថិភាព និងសុខភាពល្អ ឆាប់បានវិលត្រឡប់ទៅកាន់លំនៅឋានប្រកបរបរចិញ្ចឹមជីវិតឡើងវិញ។

ប្រភព៖ ការិយាល័យជំនួយការគណៈកម្មការទី២ព្រឹទ្ធសភា