នាព្រឹកថ្ងៃពុធ ទី១៧ ខែកុម្ភៈ ឆ្នាំ២០២១ ឯកឧត្តម យ៉ង់ សែម ប្រធានក្រុមសមាជិកព្រឹទ្ធសភាប្រចាំភូមិភាគទី៨ និងជាប្រធានគណៈកម្មការទី១ព្រឹទ្ធសភា បានទទួលជួបពិភាក្សា ពិគ្រោះយោបល់ជាមួយក្រុមមេធាវីស្ម័គ្រចិត្តសម្តេចតេជោសែន ប្រចាំនៅខេត្តក្រចេះ ដឹកនាំដោយលោកស្រី នួន ផល្លី ដើម្បីផ្សព្វផ្សាយអំពីការចុះអនុស្សារណៈយោគយល់គ្នាស្តីពីកិច្ចសហប្រតិបត្តិការរវាងគណៈកម្មការទី១ព្រឹទ្ធសភា ជាមួយកក្រុមមេធាវីស្ម័គ្រចិត្តសម្តេចតេជោសែន នៅគេហដ្ឋានរបស់ឯកឧត្តម យ៉ង់ សែម ក្នុងសង្កាត់រកាកណ្ដាល ក្រុងក្រចេះ ខេត្តក្រចេះ ដោយមានការចូលរួមពីអភិបាលស្រុកព្រែកប្រសព្វ អភិបាលរងក្រុងក្រចេះ ព្រមទាំងក្រុមប្រឹក្សាសង្កាត់រកាកណ្តាល មេភូមិ និងប្រជាពលរដ្ឋ។

តាមរយៈការចុះអនុស្សារណៈយោគយល់គ្នានេះ បានផ្តល់ភាពងាយស្រួលមួយកម្រិតទៀតសម្រាប់ក្រុមមេធាវីស្ម័គ្រចិត្តសម្តេចតេជោសែន ក្នុងការសហការជាមួយនឹងអាជ្ញាធរមូលដ្ឋាន ស្របតាមការអនុវត្តតួនាទី ភារកិច្ចរបស់ខ្លួន ផ្តល់សេវាផ្នែកច្បាប់ជូនប្រជាពលរដ្ឋឲ្យកាន់តែល្អប្រសើរ ។