នៅថ្ងៃទី៣០ ខែសីហា ឆ្នាំ២០២៥ ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា បានដឹកនាំគណៈប្រតិភូព្រឹទ្ធសភា និងតំណាងសភាពាណិជ្ជកម្មបរទេសមួយចំនួនរួមមានសភាពាណិជ្ជកម្មអាម៉េរិក អឺរ៉ុប អូស្រ្តាលី ឥណ្ឌា ហ្វ៊ីលីពីន សិង្ហបុរី និងក្រុមហ៊ុនឯកជនមួយចំនួនទៀត ជួបជាមួយ ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ ដើម្បីស្វែងយល់អំពីស្ថានភាពរស់នៅរបស់បងប្អូនជនភៀសសឹកដែលរងគ្រោះដោយសារការឈ្លានពានពីកងទ័ពថៃ កាលពីថ្ងៃទី២៤ ខែកក្កដា ឆ្នាំ២០២៥។ រយៈពេលជាងមួយខែកន្លងមកនេះ ពួកគាត់បានចាកចោលផ្ទះសម្បែង និងសត្វចិញ្ចឹមរបស់ពួកគាត់ ជាមួយនឹងការបង្ហាញអារម្មណ៍ចង់ត្រឡប់ទៅផ្ទះវិញ ដោយសង្ឃឹមថាស្ថានភាពតាមព្រំដែននឹងវិលមកសភាពល្អប្រសើរឡើងវិញក្នុងពេលឆាប់ៗនេះ ដោយសារថ្នាក់ដឹកនាំ មានភាពចាស់ទុំ និងភាពអត់ធ្មត់ខ្ពស់ ក្នុងដំណោះស្រាយជម្លោះព្រំដែនជាមួយថៃ។
ក្នុងឱកាសនោះដែរ ឯកឧត្តមបណ្ឌិត បាននាំយកអំណោយដ៏ថ្លៃថ្លារបស់ សម្ដេចតេជោ ប្រមុខរដ្ឋស្ដីទី នៃព្រះរាជាណាចក្រកម្ពុជា រួមមានសាច់ក្រក ដំណាប់ស្វាយ កាហ្វេ ដែលជាផលិតផលក្នុងស្រុក ព្រមទាំងសម្លៀកបំពាក់ ម៉ាស់ វិទ្យុទាក់ទង និងម៉ូតូមួយគ្រឿង ដើម្បីចែកជូន បងប្អូនកងទ័ពនៅកងពលលេខ១ឈរជើងនៅតាថាវ កម្លាំងផ្នែកសឹករងឆែបឈរជើងនៅសមរភូមិបុស្សស្បូវជាំតែ និងបងប្អូនជនភៀសសឹកនៅវត្តពោធិ៍ ៥០០០ដើម។
ខ្លឹមសារ៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន
