នាព្រឹកថ្ងៃសៅរ៍ ទី២០ ខែកញ្ញា ឆ្នាំ២០២៥ ឯកឧត្តម ឈើយ ចាន់ណា លេខាធិការគណៈកម្មការទី៧ព្រឹទ្ធសភា និងជាលេខាធិការក្រុមសមាជិកព្រឹទ្ធសភាប្រចាំភូមិភាគទី៤ រួមជាមួយ ឯកឧត្ដម អុឹម ស៊ីថុល រដ្ឋលេខាធិការប្រចាំការ ក្រសួងកសិកម្ម រុក្ខាប្រមាញ់ និងនេសាទ អមដោយមន្រ្តីក្រុមការងារថ្នាក់ជាតិចុះមូលដ្ឋានស្រុកស្វាយចេក លោក ដា ទឹង ប្រធានក្រុមប្រឹក្សាស្រុក លោក លឿង សុភក្តិ អភិបាលស្រុក លោកមេឃុំ បានអញ្ជើញនាំយកទេយ្យវត្ថុ និងបច្ច័យ វេរប្រគេនព្រះសង្ឃគង់ចាំព្រះវស្សានៅវត្តល្បើកស្វាយ ឃុំស្វាយចេក និងវត្តបឹងស្នោរ ឃុំស្លក្រាម ស្ថិតនៅតាមបណ្ដោយព្រំដែនកម្ពុជា-ថៃ ភូមិសាស្រ្តស្រុក ស្វាយចេក ខេត្តបន្ទាយមានជ័យ។ ឯកឧត្តមបានអញ្ជើញបន្តដំណើរ ចូលរួម រំលែកមរណទុក្ខដល់សព លោក ណាក អ៊ុត អតីតប្រធាននគរបាលស្រុក ថ្មពួក ខេត្តបាត់ដំបង ក្នុងកំឡុងឆ្នាំ១៩៧៩ រហូតដល់ឆ្នាំ១៩៨៨ ដែលបានទទួលមរណភាពក្នុងជន្មាយុ ៨៦ឆ្នាំ ដោយរោគាពាធ ស្ថិតនៅភូមិរលូស ឃុំរលូស ស្រុកស្វាយចេក ខេត្តបន្ទាយមានជ័យ។ សូមឧទ្ទិសបួងសួងដល់ដួងវិញ្ញាណឧបាសកបានទៅកាន់សុគតិភព កុំបីឃ្លៀងឃ្លាតឡើយ។

ប្រភព៖ ការិយាល័យ​ជំនួយ​ការ​គណៈកម្មការ​ទី៧ព្រឹទ្ធសភា