នាព្រឹកថ្ងៃទី៣០ ខែតុលា ឆ្នាំ២០២៥ លោកជំទាវ ឃួន ឃុនឌី លេខាធិកាគណៈកម្មការទី៨ព្រឹទ្ធសភា និងជាអនុប្រធានក្រុមសមាជិកព្រឹទ្ធសភាប្រចាំភូមិភាគទី៨ និងលោកជំទាវ យស ថានារី អ្នកតំណាងរាស្ត្រមណ្ឌលខេត្តកំពង់ធំ បានអញ្ជើញជាអធិបតីក្នុងពិធីប្រារព្ធខួបលើកទី២៧ ទិវាមនុស្សចាស់កម្ពុជា និងទិវាមនុស្សចាស់អន្តរជាតិ ថ្ងៃទី១ ខែតុលា ឆ្នាំ២០២៥ ក្រោមប្រធានបទ «វ័យចាស់ដោយសេចក្តីថ្លៃថ្នូរ» ដែលមានការអញ្ជើញចូលរួមពីលោកប្រធានមន្ទីរសង្គមកិច្ចខេត្ត អភិបាលរងស្រុក តំណាងអង្គការមនុស្សចាស់កម្ពុជា គណៈកម្មការសមាគមមនុស្សចាស់ឃុំជ័យ អាជ្ញាធរឃុំ ភូមិ និងសមាគមមនុស្សចាស់ សរុបចំនួន២០៣នាក់ ស្ថិតនៅវត្តមហរ ភូមិមហរ ឃុំជ័យ ស្រុកកំពង់ស្វាយ ខេត្តកំពង់ធំ ។
នាឱកាសនោះ លោកជំទាវបានលើកឡើងថា តាមរយៈសារាចរណែនាំអំពីការរៀបចំទិវាមនុស្សចាស់នេះ គឺដើម្បីលើកកម្ពស់កិច្ចគាំពារដ៏មានប្រសិទ្ធភាព សំដៅលើកស្ទួយសុខុមាលភាពរបស់មនុស្សវ័យចាស់ឱ្យកាន់តែប្រសើរឡើង ហើយទិវានេះ ក៏បង្ហាញឱ្យឃើញអំពីតួនាទីដ៏សំខាន់ និងគុណតម្លៃរបស់មនុស្សចាស់ ជាបុព្វការីជនដែលបានបង្កើតធនធានដ៏មានសារប្រយោជន៍ ព្រមទាំងផ្តល់នូវចំណេះដឹង ចំណេះធ្វើ និងបទពិសោធន៍យ៉ាងច្រើនឥតគណនា សម្រាប់មនុស្សជំនាន់ក្រោយ ។
ក្នុងឱកាសនោះដែរ លោកជំទាវបានជូនលោកតា លោកយាយចំនួន២០៣នាក់ ដោយម្នាក់ៗទទួលបានសារុង១ ក្រមា១ និងថវិកាមួយចំនួន។
ប្រភព៖ ជំនួយការលោកជំទាវ ឃួន ឃុនឌី
សម្រួលខ្លឹមសារ៖ នាយកដ្ឋានព័ត៌មាន
