នាព្រឹកថ្ងៃទី១ ខែវិច្ឆិកា ឆ្នាំ២០២៥ លោកជំទាវ ម៉ាណ ណាវី សមាជិកាក្រុមសមាជិកព្រឹទ្ធសភាប្រចាំភូមិភាគទី១ បានអញ្ជើញជាអធិបតីក្នុងពិធីបើកបវេសនកាលឆ្នាំសិក្សាថ្មី២០២៥-២០២៦ នៃសាលាបឋមសិក្សាត្រពាំងឈូក ស្ថិតនៅឃុំបឹង ស្រុកបារាយណ៍ ខេត្តកំពង់ធំ ។ កម្មវិធីនេះមានការអញ្ជើញចូលរួមពី គណៈអ៊ីមាំខេត្ត សមាជិកក្រុមប្រឹក្សាស្រុក សមាជិកក្រុមប្រឹក្សាឃុំ លោកគ្រូ អ្នកគ្រូ និងសិស្សានុសិស្សជាច្រើនផងដែរ ។
ក្នុងពិធីបើកបវេសនកាលនេះ លោកជំទាវមានប្រសាសន៍ដ៏មានអត្ថន័យទៅកាន់ប្អូនៗថា ការសិក្សាពិតជាមានសារៈសំខាន់ណាស់ដែលផ្ដល់នូវចំណេះដឹង និងឱកាសថ្មីៗសម្រាប់ប្អូនៗ ចង់ជួយគ្រួសារ និងសង្គមជាតិ ខ្លួនឯងត្រូវតែរឹងមាំ និងមានចំណេះដឹងខ្ពស់ ដើម្បីអាចរកការងារដែលខ្លួនស្រលាញ់ពេញចិត្ត និងទទួលបានប្រាក់ខែខ្ពស់។
ជាមួយគ្នានេះ ដើម្បីលើកទឹកចិត្តដល់ លោកគ្រូ អ្នកគ្រូ និងសិស្សានុសិស្ស លោកជំទាវ ក៏បានឧបត្ថម្ភថវិកាចំនួន ២,០៥០,០០០រៀលផងដែរ។
ប្រភព៖ ក្រុមជំនួយការលោកជំទាវ ម៉ាណ ណាវី
