នាថ្ងៃសៅរ៍ ទី៦ ខែធ្នូ ឆ្នាំ២០២៥ ឯកឧត្តម និន សុទ្ធីវង្ស ទីប្រឹក្សា តំណាងដ៏ខ្ពង់ខ្ពស់របស់ ឯកឧត្តម អ៊ុច បូររិទ្ធ ប្រធានស្តីទីព្រឹទ្ធសភា អមដំណើរដោយឯកឧត្តម លោកជំទាវ ជាទីប្រឹក្សា សមាជិក និងសមាជិកាខុទ្ទកាល័យ បានអញ្ជើញចុះសាកសួរសុខទុក្ខ និងនាំយកអំណោយរបស់ឯកឧត្តម ប្រធានស្តីទីព្រឹទ្ធសភា និងសប្បុរសជន ដែលមានជាទឹកបរិសុទ្ធចំនួន៩០០កេស (១លីត្រកន្លះ/១ដប) និងសម្ភារៈប្រើប្រាស់ចាំបាច់ផ្សេងទៀត ជូនវីរយុទ្ធជនការពារប្រាសាទតាមាន់ធំ ប្រាសាទតាក្របី និងប្រាសាទខ្នា ក្នុងបរិវេណទីស្នាក់ការកងពលតូចថ្មើជើងលេខ៤២ និងកងអនុសេនាធំទី១ ដែលស្ថិតនៅស្រុកសំរោង ខេត្តឧត្តរមានជ័យ។
នៅក្នុងឱកាសនោះ ឯកឧត្តម និន សុទ្ធីវង្ស បានពាំនាំការផ្ដាំផ្ញើសាកសួរសុខទុក្ខ និងក្ដីនឹករលឹករបស់សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី និងសម្តេចកិត្តិព្រឹទ្ធបណ្ឌិត ដែលលោកទាំងពីរតែងតែយកចិត្តទុកដាក់ខ្ពស់បំផុតចំពោះសុខទុក្ខរបស់វីរយុទ្ធជនដែលបាននិងកំពុងឈរជើងយ៉ាងរឹងមាំ តស៊ូ ការពារទឹកដីមាតុភូមិកម្ពុជា។ ជាមួយគ្នានេះ ឯកឧត្តមទីប្រឹក្សា ក៏បានពាំនាំការសួរសុខទុក្ខ និងសេចក្តីនឹងរលឹករបស់ ឯកឧត្តម អ៊ុច បូររិទ្ធ ប្រធានស្តីទីព្រឹទ្ធសភា ដែលជានិច្ចកាលតែងវាយតម្លៃខ្ពស់បំផុត និងគោរពចំពោះការតស៊ូ លះបង់ និងវីរភាពអង្គអាចក្លាហានបស់បងប្អូនវីរយុទ្ធជនក្នុងការពារបូរណភាពទឹកដី និងអធិបតេយ្យជាតិ។ ឯកឧត្តម បានបន្ថែមថា សកម្មភាពចុះសាកសួរសុខទុក្ខបងប្អូនវីរកងទ័ពក្រុមគ្រួសារ និងបងប្អូនប្រជាជនភៀសសឹកជាបន្តបន្ទាប់ក្នុងរយៈកាលកន្លងមក ក៏ដូចជាពេលនេះ គឺជាសក្ខីភាពបង្ហាញពីស្មារតីសាមគ្គីភាព ឯកភាពជាតិជាធ្លុងមួយ ក្រោមការដឹកនាំប្រកបដោយគតិបណ្ឌិត និងទស្សនៈវិស័យវែងឆ្ងាយរបស់សម្តេចតេជោ ប្រមុខរដ្ឋស្តីទី និង សម្តេចធិបតី នាយករដ្ឋមន្រ្តី ក្នុងការកាពារ សន្តិភាព ស្ថេរភាព អធិបតេយ្យ បូរណៈភាពាដែនដី និងការអភិវឌ្ឍប្រទេសជាតិ។
ជាចុងក្រោយ ឯកឧត្តមទីប្រឹក្សា បានសម្តែងនូវការដឹងគុណ និងគារវកិច្ចដ៏ជ្រាលជ្រៅ ចំពោះវីរភាពអង់អាចក្លាហាន មោះមុតដ៏គួរឱ្យកោតស្ញប់ស្ញែងរបស់វីរយុទ្ធជន ដើម្បីបុព្វហេតុការពារជាតិមាតុភូមិកម្ពុជា ព្រមទាំងបានបួងសួងដល់គុណបុណ្យព្រះរតនត្រ័យ គុណកែវទាំងបី សូមតាមអភិបាលប្រោះព្រំ ឃុំគ្រងថែរក្សា និងប្រសិទ្ធពរជ័យជូនវីរយុទ្ធជនដ៏អង់អាចក្លាហាននៅតាមព្រំដែន សូមជួបតែសុខសុវត្ថិភាព និងទទួលបានជ័យជម្នះលើសមរភូមិ កម្ចាត់បច្ចាមិត្តឈ្លានពានឱ្យវិនាសអន្តរាយ។
ប្រភព៖ ខុទ្ទកាល័យឯកឧត្តម អនុប្រធានទី១ព្រឹទ្ធសភា
