ក្រុមសមាជិកាព្រឹទ្ធសភា ដឹកនាំដោយលោកជំទាវ មាន សំអាន ប្រធានក្រុម និងជាអនុប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍ បានអញ្ជើញជួបសំណេះសំណាល សួរសុខទុក្ខ និងនាំយកចង្ក្រានសន្សំសំចៃថាមពលដែលជាអំណោយរបស់ក្រុមហ៊ុនSIPCO និងភួយ ចែកជូនប្រជាពលរដ្ឋចំនួន ៣០០គ្រួសារ ព្រមទាំងអញ្ជើញនាំយកទេយ្យទាន និងបច្ច័យប្រគេនព្រះចៅអធិការវត្តពោធិ៍បក្ខីសិរីអយុធ្យា (វត្តក្រយា) ស្ថិតនៅឃុំក្រយា ស្រុកប្រាសាទបល្ល័ង្ក ខេត្តកំពង់ធំ នាព្រឹកថ្ងៃអាទិត្យ ២រោច ខែមិគសិរ ឆ្នាំម្សាញ់ ពុទ្ធស័ករាជ២៥៦៩ ត្រូវនឹងថ្ងៃទី៧ ខែធ្នូ ឆ្នាំ២០២៥។
ថ្លែងក្នុងពិធីសំណេះសំណាល លោកជំទាវប្រធាន បាននាំយកប្រសាសន៍ផ្ដាំផ្ញើសាកសួរសុខទុក្ខនិងប្រកបដោយក្តីនឹករលឹកពីសំណាក់សម្តេចតេជោ ហ៊ុន សែន ប្រធានព្រឹទ្ធសភា សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្ដេចធិបតី ហ៊ុន ម៉ាណែត និងលោកជំទាវបណ្ឌិត ព្រមទាំងសម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ ប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍។
ក្នុងឱកាសនោះផងដែរ លោកជំទាវ បានរំលឹកអំពីខួបអនុស្សាវរីយ៍លើកទី៤៧ នៃទិវាកំណើតរណសិរ្សសាមគ្គីអភិវឌ្ឍន៍មាតុភូមិកម្ពុជា និងអត្ថន័យនៃថ្ងៃប្រវត្តិសាស្ត្រ ២ធ្នូ ដែលជាថ្ងៃនាំសំណាងដ៏ធំធេងបំផុតដល់ប្រទេសជាតិ និងប្រជាជនកម្ពុជា គឺមានព្រឹត្តិការណ៍ជាប្រវត្តិសាស្ត្រធំៗចំនួន៣គឺ៖១.ថ្ងៃ២ធ្នូ ឆ្នាំ១៩៧៨ ជាថ្ងៃនៃការបង្កើតរណសិរ្សសាមគ្គីសង្គ្រោះជាតិកម្ពុជា ឈានទៅរំដោះជាតិ និងប្រជាជនកម្ពុជាពីរបបប្រល័យពូជសាសន៍ នៅថ្ងៃទី៧ ខែមករា ឆ្នាំ១៩៧៩
២.ថ្ងៃ២ធ្នូ ឆ្នាំ១៩៨៧ ជាព្រឹត្តិការណ៍ប្រវត្តិសាស្ត្រ ការចរចាជាលើកដំបូងរវាង ព្រះករុណាព្រះបាទសម្តេចព្រះ នរោត្តម សីហនុ និងសម្តេចតេជោ ហ៊ុន សែន នៅហ្វែរអង់តាដឺន័រ ប្រទេសបារាំង នាំដល់កិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ និងការបោះឆ្នោតឆ្នាំ១៩៩៣
៣.ព្រឹត្តិការណ៍ ២ធ្នូ ឆ្នាំ១៩៩៨ ថ្ងៃបង្កើតយុទ្ធសាស្ត្រត្រីកោណ បានឈានដល់ការរលំរលាយនៃអង្គការចាត់តាំងនយោបាយនិងយោធារបស់ខ្មែរក្រហមក្រោមនយោបាយ ឈ្នះ ឈ្នះ! របស់សម្តេចតេជោ ហ៊ុន សែន នាំមកនូវសុខសន្តិភាពពេញលេញ ពាសពេញផ្ទៃប្រទេសនៅថ្ងៃទី២៩ ខែធ្នូ ឆ្នាំ១៩៩៨។
បន្ថែមពីនេះ លោកជំទាវបានលើកឡើងអំពីសភាពការណ៍ព្រំដែន ជាពិសេសផ្លែផ្កាជាវិជ្ជមានគួរជាទីមោទនៈ នៃយុទ្ធសាស្ត្រស្ងាត់តែមិនស្ងៀម របស់សម្តេចតេជោ សម្តេចធិបតី ដែលនាំកម្ពុជាឱ្យចៀសផុតនៅដំណាក់កាលនេះ ពីវិនាសកម្មដ៏ធំធេង ដែលកើតចេញពីសមរភូមិសង្គ្រាមរវាងថៃ និងកម្ពុជា ដោយបានដឹកដៃភាគីថៃ ចូលក្នុងសមរភូមិការទូត ដោយមានអន្តរជាតិដឹងឮ និងសមរភូមិផ្លូវច្បាប់ ដែលនេះជាសមរភូមិល្អបំផុត ដើម្បីធានាបាននូវការការពារបូរណភាពទឹកដីរបស់កម្ពុជា ដោយមិនមានការបង្ហូរឈាម និងបានអរគុណនិងសំណូមពរឱ្យពុកម៉ែបងប្អូនទាំងអស់គ្នា ជឿទុកចិត្តលើការដឹកនាំរបស់សម្តេចទាំងទ្វេ ក្នុងការនាំនាវាកម្ពុជាឆ្ពោះទៅរកសុខសន្តិភាព និងភាពជឿនលឿន។
ជាមួយគ្នានេះ លោកជំទាវបានសម្តែងនូវសេចក្តីរីករាយ និងកោតសរសើរចំពោះកិច្ចខិតខំប្រឹងប្រែងយកអស់កម្លាំងកាយចិត្ត ប្រាជ្ញា ស្មារតី និងទទួលខុសត្រូវក្នុងការបំពេញភារកិច្ចការងារក្នុងរយៈពេលកន្លងមក របស់ថ្នាក់ដឹកនាំគ្រប់លំដាប់ថ្នាក់ នៃស្រុកប្រាសាទបល្ល័ង្ក ទទួលបានជោគជ័យគួរឱ្យកត់សម្គាល់។
លោកជំទាវបានបញ្ជាក់ថា ការចែកចង្ក្រានសន្សំសំចៃថាមពលជូនបងប្អូនប្រជាពលរដ្ឋនាពេលនេះ គឺដើម្បីឱ្យយើងទាំងអស់គ្នាចូលរួមសន្សំសំចៃថាមពល និងការការពារបរិស្ថាន រួមចំណែកការពារសុខុមាលភាពរបស់ប្រជាពលរដ្ឋនៅក្នុងមូលដ្ឋាន និងចូលរួមចំណែកក្នុងការកាត់បន្ថយនូវការចំណាយរបស់បងប្អូនប្រជាពលរដ្ឋ។
អំណោយដែលបានផ្តល់ជូនប្រជាពលរដ្ឋក្នុងឱកាសនោះ ក្នុង១គ្រួសារទទួលបាន៖ នំប៉័ង ចង្ក្រានសន្សំសំចៃថាមពល ចំនួន១ និងភួយ ចំនួន១ ព្រមទាំងឧបត្ថម្ភទឹកប្រាក់ដល់ស្រ្តីមានផ្ទៃពោះចំនួន១៣នាក់ និងអនុសាខាសមាគមនារីកម្ពុជាដើម្បីសន្តិភាពនិងអភិវឌ្ឍន៍ស្រុកប្រាសាទបល្ល័ង្ក។
ប្រភព៖ នាយកដ្ឋានព័ត៌មាន
