នាចន្លោះសម័យប្រជុំលើកទី៤ និងទី៥របស់ព្រឹទ្ធសភា លោកជំទាវ មាន សំអាន ប្រធានក្រុម លោកជំទាវ ចឹក ហេង និងលោកជំទាវ ម៉ាណ ណាវី សមាជិកាក្រុមសមាជិកាព្រឹទ្ធសភា បានអញ្ជើញចុះជួបប្រជុំជាមួយសមាជិកក្រុមប្រឹក្សាឃុំ សង្កាត់ជាស្ត្រីក្នុងស្រុកចំនួន៥ រួមមាន៖ ស្រុកអូរជុំ ស្រុកតាវែង ស្រុកកូនមុំ ស្រុកវើនសៃ និងក្រុងបានលុង សរុបចំនួន៥៥រូប នៅសាលាស្រុកអូរជុំ ខេត្តរតនគិរី នារសៀលថ្ងៃទី១០ ៨រោច ខែមាឃ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១០ ខែកុម្ភៈ ឆ្នាំ២០២៦ ។
ជាកិច្ចចាប់ផ្តើម ក្រុមសមាជិកាព្រឹទ្ធសភា និងអង្គពិធីទាំងមូល បានសម្រួមកាយចិត្តគោរពវិញ្ញាណក្ខន្ធវីរកងទ័ព និងដឹងគុណមិនអាចកាត់ថ្លៃបាន ចំពោះពលិកម្មគ្រប់បែបយ៉ាងរបស់វីរកងទ័ពក្នុងបុព្វហេតុការពារជាតិ មាតុភូមិ និងប្រជាពលរដ្ឋ ព្រមទាំងសូមកោតសរសើរនូវវប្បធម៌ចែករំលែកជួយសម្រាលទុក្ខលំបាកវីរកងទ័ព នៅសមរភូមិមុខ និងប្រជាពលរដ្ឋភៀសសឹក នៅតាមបណ្តាខេត្តជាប់ព្រំដែនកម្ពុជា-ថៃ ដែលបាននិងកំពុងជួបប្រទះនូវការលំបាក ដោយសារសង្រ្គាមឈ្លានពានរបស់កងទ័ពថៃមកលើដែនអធិបតេយ្យភាពរបស់កម្ពុជា។
ឆ្លៀតក្នុងឱកាសនោះ លោកជំទាវប្រធានក្រុម បាននាំនូវការផ្តាំផ្ញើសួរសុខទុក្ខពីសំណាក់ថ្នាក់ដឹកនាំព្រឹទ្ធសភាជូនចំពោះថ្នាក់ដឹកនាំខេត្ត មន្ត្រីរាជការ កងកម្លាំងនៅមូលដ្ឋានគ្រប់លំដាប់ថ្នាក់ ក្នុងខេត្តរតនគិរីប្រកបដោយក្តីនឹករលឹកបំផុត ហើយក៏បានជម្រាបជូនពីគោលបំណងនៃការចុះជួបប្រជុំជាមួយក្រុមប្រឹក្សាឃុំជាស្ត្រីនាពេលនេះ គឺដើម្បីផ្សារភ្ជាប់ និងការរួមប្រាស្រ័យទំនាក់ទំនងឱ្យកាន់តែជិតស្និទ្ធជាមួយអង្គបោះឆ្នោត ដែលជាសមាជិកក្រុមប្រឹក្សាឃុំ នៅមូលដ្ឋាន ព្រមទាំងឈ្វេងយល់ពីវឌ្ឍនភាពការងារឆ្នាំ២០២៥ តម្រូវការ ការអនុវត្តគោលនយោបាយ ស្តីពីការលើកកម្ពស់សមភាពយេនឌ័រ ផែនការ សកម្មភាពការងារសម្រាប់ឆ្នាំ២០២៦ ឆ្លុះបញ្ចាំងការអនុវត្តគោលនយោបាយអភិវឌ្ឍន៍ឃុំ សង្កាត់ ឆ្នាំ២០២២-២០២៧ និងដើម្បីពង្រឹងពង្រីកការអនុវត្តមុខងារតំណាងឱ្យមានគុណភាព តម្លាភាព ប្រសិទ្ធភាព និងគណនេយ្យភាព។
លោកជំទាវ បានផ្តាំផ្ញើសមាជិកក្រុមប្រឹក្សាឃុំ សង្កាត់ បន្តយកចិត្តទុកដាក់តាមដាន និងអនុវត្តនូវការសន្យា ដែលបានសន្យានាអំឡុងពេលបោះឆ្នោតកន្លងមក និងសូមបន្តយកចិត្តទុកដាក់អនុវត្តន៍ឱ្យបានខ្ជាប់ខ្ជួន ក្នុងការផ្តល់សេវាសាធារណៈជូនប្រជាពលរដ្ឋក្នុងមូលដ្ឋានប្រកបដោយប្រសិទ្ធភាព ហើយត្រូវចេះលើកផែនការថវិកាអភិវឌ្ឍន៍ឃុំ សង្កាត់របស់ខ្លួន ព្រមទាំងអំពាវនាវដល់ប្រជាពលរដ្ឋត្រូវតស៊ូ អត់ធ្មត់ ជឿទុកចិត្តលើថ្នាក់ដឹកនាំរាជរដ្ឋាភិបាល និងវីរភាពដ៏អង់អាចក្លាហានរបស់វីរយុទ្ធកងទ័ពយើង និងរួមសាមគ្គីគ្នាជាធ្លុងមួយឱ្យបានរឹងមាំ ក្នុងគ្រាដែលប្រទេសជាតិកំពុងជួបប្រទះសង្គ្រាមឈ្លានពានពីថៃ។
បន្ទាប់មកលោកជំទាវប្រធានក្រុម បានជូនដបទឹករក្សាកំដៅ១ ក្រណាត់មួយដុំ និងថវិកាមួយចំនួនដល់ក្រុមប្រឹក្សាឃុំ សង្កាត់។
ប្រភព៖ នាយកដ្ឋានព័ត៌មាន
