នៅល្ងាចថ្ងៃចន្ទ ទី៩ ខែកុម្ភៈ ឆ្នាំ២០២៦ ឯកឧត្តម ឈើយ ចាន់ណា លេខាធិការគណ:កម្មការទី៧ព្រឹទ្ធសភា និងជាលេខាធិការក្រុមសមាជិកព្រឹទ្ធសភាប្រចាំភូមិភាគទី៤ រួមជាមួយ ឯកឧត្តម អ៊ី ឡុង អ្នកតំណាងរាស្រ្តមណ្ឌលខេត្តបន្ទាយមានជ័យ ឯកឧត្ដម ប្លែក វារី ប្រធានក្រុមប្រឹក្សាខេត្ត ឯកឧត្ដម អ៊ុ រាត្រី អភិបាល នៃគណៈអភិបាលខេត្ត លោកឧត្ដមសេនីយ៍ទោ សិទ្ធិ ឡោះ ស្នងការនគរបាលខេត្ត បានអញ្ជើញចូលរួមពិធីបូជាសព លោកវរសេនីយ៍ទោ យី សុថាត់ នាយរងផ្នែកប្រឆាំងគ្រឿងញៀន នៃអធិការដ្ឋាននគរបាលស្រុកថ្មពួក វីរនគរបាល រងរបួសដោយសារអំបែងគ្រាប់ចំផ្នែកក្បាលរងរបួសធ្ងន់ក្នុងសមរភូមិបឹងត្រកួន ពេលប្រយុទ្ធតតាំងជាមួយទាហានថៃឈ្លានពានទឹកដីព្រំដែនកម្ពុជា កាលថ្ងៃទី១០ ខែធ្នូ ឆ្នាំ២០២៥ សម្រាកព្យាបាលនៅមន្ទីរពេទ្យមិត្តភាពកម្ពុជា-ចិន កុសុម: រាជធានីភ្នំពេញ ហើយបានទទួលមរណភាពនៅវេលាម៉ោង១២:៤៥នាទីថ្ងៃត្រង់ នាថ្ងៃទី៦ ខែកុម្ភៈ ឆ្នាំ២០២៦ ក្នុងជន្មាយុ ២៧ឆ្នាំ។ ពិធីបុណ្យបូជាសពនេះ បានប្រារព្ធដង្ហែពីគេហដ្ឋាននៃសពឆ្ពោះទៅកាន់វត្តរតនវនប្រាសាទបន្ទាយឆ្មារ ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។
ពិធីផ្ដល់ភ្លើងបូជាសពដោយ ព្រះខេមញាណ រ៉េន ស៊ីណាត ព្រះគ្រូចៅអធិការ វត្តថ្មរមៀល។ ពិធីនេះផងដែរមាន ឯកឧត្ដម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត ស្នងការងនគរបាល អធិការ កងកំលាំងនគរបាល ថ្នាក់ដឹកនាំមន្រ្តីរាជការខេត្ត ក្រុង ស្រុក លោកគ្រូ អ្នកគ្រូ យុវជន សសយក កាយរឹទ្ធិ កាកបាទក្រហម បងប្អូនញាតិមិត្តជិតឆ្ងាយ និងសិស្សានុសិស្សយ៉ាងច្រើនកុះករតាមប្រពៃណីព្រះពុទ្ធសាសនា។ សូមឧទ្ទិសបួងសួងដល់ដួងវិញ្ញាណលោកវីរសេនីយ៍ទោ យី សុថាត់ បានទៅកាន់សុគតិភពកុំបីឃ្លៀងឃ្លាតឡើយ។
ប្រភព៖ ការិយាល័យជំនួយការគណៈកម្មការទី៧ព្រឹទ្ធសភា
