នារសៀលថ្ងៃទី២៣ ខែកុម្ភៈ ឆ្នាំ២០២៦ ក្នុងកិច្ចប្រជុំបូកសរុបលទ្ធផលការងារប្រចាំខែកុម្ភៈ និងលើកទិសដៅការងារខែមីនា ឆ្នាំ២០២៦ របស់ខុទ្ទកាល័យ នៅសាលប្រជុំខុទ្ទកាល័យអនុប្រធានទី២ព្រឹទ្ធសភានៃវិមានសាមគ្គីភាពព្រឹទ្ធសភា ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា បានលើកឡើងថា សមាជិកខុទ្ទកាល័យ ត្រូវរៀបចំផែនការការងាររបស់ខ្លួន ផ្សារភ្ជាប់និងសូចនាករដែលអាចវាស់វែងបាន ទើបអាចវាយតម្លៃលទ្ធផលជាក់ស្តែងនៅចុងឆ្នាំបាន។ ការងាររបស់ខុទ្ទកាល័យ ត្រូវផ្តោតសំខាន់លើការតាមដានរាល់កិច្ចការដែលជាប្រយោជន៍របស់ប្រជាពលរដ្ឋ ជាពិសេសបញ្ហានានាដែលប៉ះពាល់ដល់ជីវភាពរស់នៅប្រចាំថ្ងៃរបស់គាត់។
ឯកឧត្តមបណ្ឌិត បន្ថែមទៀតថា សាមគ្គីភាព សុខភាព សមត្ថភាព និងសកម្មភាព ប្រកបដោយគំនិតច្នៃប្រឌិត នឹងជួយលើកកម្ពស់សេដ្ឋកិច្ច សង្គម និងស្ថិរភាពនយោបាយកម្ពុជា ដើម្បីឆ្ពោះទៅសម្រេចជាប្រទេសមានចំណូលកម្រិតខ្ពស់នៅឆ្នាំ២០៥០។ ឯកឧត្តមបណ្ឌិត ក៏បានបន្តជំរុញការគាំទ្រផលិតផលខ្មែរ និងផលិតកម្មក្នុងស្រុកឱ្យមានចីរភាពតាមរយៈ ការជួយទិញ ជួយផ្សព្វផ្សាយ និងជួយបង្កើតថ្មីពីប្រជាជនខ្មែរ ធ្វើយ៉ាងណាឱ្យមានផលិតផលខ្មែរផ្គត់ផ្គង់លើទីផ្សារកាន់តែច្រើន គ្រប់តាមតម្រូវការ និងមាននិរន្តរភាព។
ខ្លឹមសារ៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន
