ក្នុងពិធីសំណេះសំណាលជាមួយសមាជិកក្រុមប្រឹក្សាសង្កាត់ទាំង៨០រូប នៃខណ្ឌច្បារអំពៅ នារសៀលថ្ងៃទី២៦ ខែកុម្ភៈ ឆ្នាំ២០២៦ នៅវិមានព្រឹទ្ធសភា ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា និងជាប្រធានក្រុមសមាជិកព្រឹទ្ធសភាប្រចាំភូមិភាគទី១ (រាជធានីភ្នំពេញ) បានលើកទឹកចិត្តឱ្យខណ្ឌនីមួយៗប្រកួតប្រជែងគ្នាទាក់ទាញទេសចរនិងវិនិយោគិន ព្រមទាំងជំរុញផលិតកម្មក្នុងស្រុក និងលុបបំបាត់ការឆបោកតាមអនឡាញ។
ក្នុងឱកាសនេះ ឯកឧត្តមបណ្ឌិត បានកោតសរសើរថ្នាក់ដឹកនាំសង្កាត់ និងខណ្ឌច្បារអំពៅ ដែលខិតខំបំពេញការងារបានយ៉ាងល្អកន្លងមក ដែលធ្វើឱ្យខណ្ឌនេះបានក្លាយជាខណ្ឌដែលបង្កើននូវការចាប់អារម្មណ៍ក្នុងការរស់នៅ ប្រកបអាជីវកម្ម និងការវិនិយោគជាដើម។ ជាមួយគ្នានេះ ឯកឧត្តមបណ្ឌិត បានជំរុញឱ្យអាជ្ញាធរខណ្ឌនិងសង្កាត់ បន្តខិតខំទាក់ទាញ និងបង្កភាពងាយស្រួលដល់វិនិយោគិនលើផ្នែកទេសចរណ៍ និងអ្នកប្រកបអាជីវកម្មនៅក្នុងមូលដ្ឋានរបស់ខ្លួន ព្រមទាំងពង្រឹងសណ្តាប់ធ្នាប់សាធារណៈ និងថែរក្សាសោភណភាពតាមដងផ្លូវ ដើម្បីផ្ដល់ទំនុកចិត្តដល់ទេសចរ មកកំសាន្តនៅប្រទេសកម្ពុជាយើងបន្ថែមទៀត។
មុននឹងបញ្ចប់កម្មវិធី ឯកឧត្តមបណ្ឌិត បានបញ្ជាក់ផងដែរថា កត្តាសាមគ្គីភាពផ្ទៃក្នុងដ៏រឹងមាំរបស់ជាតិ និងសុខសន្តិភាព គឺជាអាទិភាពនៃវឌ្ឍនភាពរបស់ជាតិ ដែលប្រជាជនយើងប្រាថ្នាចង់បាន។
ខ្លឹមសារ៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន
